Enkuantu, traballadór hamutuk na’in 60 ne’ebé atu ba servisu iha Austrália iha fulan ne’e nia laran kompostu husi mane 49 no feto 11, ne’ebé hetan kontratu husi kompanha haat iha Nasaun Austrália.
Reprezentante Sekretariu Estadu Formasaun Profisionál no Empregu (SEFOPE), Diretór Jerál Korporativas, Nelson Carvalho husu ba traballadór sira banhira atu ba servisu iha ema nia rai atu labele mete iha joga, hemu tua no buat seluk ne’ebé la fó vantajem ba imi-nia servsiu.
Nia afirma, nune’e mós joven sira ne’ebé mete iha organizasaun arte-masiais tenki husik hela uma no kuartu laran, tanba ba servisu iha Australia la’os organizasaun nian maibé, lori Nasaun Timor-Leste nia naran.
“Envolvimetu joven sira ne’ebé ba servisu iha Austrália barak mak envolve an iha arte-marsiais, tan ne’e bainhira ita-boot sira mai asina ona deklarasaun ho governu liu husi SEFOPE, ha’u hakarak husik hela katak ita boot sira-nia arte-marsiais neste momentu tenki husik rai hela iha ita-nia kuartu laran, uma nia labele lori ba ema nia nasaun,” dehan Diretór iha Salaun SEFOPE Kaikoli, Tersa (20/02).
Iha fatin hanesan, Reprezentante Inan-Aman husi traballadór nian, Vítor Manuel Pereira Mousaco, hato’o agrdese ba Governu liu husi SEFOPE tanba sira-nia oan bele hetan ona oportunidade hodi ba servisu iha rai liur hodi hadia sira-nia ekonomia uma laran.
“agradese tebes tanba ami-nia oan bele hetan oprtunidade ida ne’e, tanba ema seluk nia oan sedauk hetan oportunidade hanesan ami-nia oan sira ne’ebé hetan,” dehan nia.
Nia afirma, ho oportunidade ne’ebé oan sira hetan, inan-aman husik ona responsabilidade ne’e sira, responsabilidade ba sira nian an, ba nasaun no mós ba família tanba ne’e disiplina ne’e importante tebes.