Xefe grupo HANA, Nicodemos Moniz hatete, grupu HANA durante ne’e eziste kle’ur ona, maibé la iha parte ida atu apoiu sira, tan ne’e iha IX governu grupu refere halo proposta no hetan apoiu husi governu ho montante rihun lima ($5).
Nia dehan liu husi proposta ne’ebé sira governu apoiu osan ho montante rihun lima, hodi prepara ai-oan sira hanesan ai kakeu, vanilla, gamal, rambutan, saburaka, maibé dadaun ne'e grupu refere foku liu ba ai kakeu.
“Husi ai oan sira ne’e balun sei dauk iha tan ne’e sei halai liu ba kakeu tanba governu nia planu atu taka ai-maran ne’ebé mak Dili laran,” dehan xefe grupu hafoin remata lansamentu kuda plantasaun ai-sunu, iha aldeia Darlau, Kinta (25/01).
Governu atu hapara ema ne'ebé fa'an ai sunu iha Dili laran hodi evita tesi ai arbiru, tanba ne'e Grupu HANA kuda Ai-kakeu atu nune'e banhira governu bandu ema atu tesi ai arbiru karik HANA iha ona ai-sunu atu responde ba komunidade sira ne'ebé mak uza ai sunu hodi tein, tanba iha Dili laran komunidade barak nafatin uza ai sunu hodi tein.
Iha fatin hanesan, Sekretario Estadu Florestas (SEF), Fernandino da Costa Vieira hatete, tuir polítika governu nian, kada tinan sempre prodúz ai oan hamutuk tokon ida maibé iha tinan ne'e produz deit ai oan hamutuk rihun 60 hodi kuda iha munisípiu sira seluk ne'ebé identifika ona.
“ai-oan rihun 60 sei kuda iha Munispiu sira no projetu sira ne’ebé identifika ona no komunidade sira ne’ebé mak husu ai-horis,” dehan Governante.
Governante akresenta, ai oan hirak ne'ebe kuda mak hanesan ai komersial, ai ne'ebe iha valor ekonomia ho presu di'ak kuda mos ai-oan ho funsaun konservasaun protesaun inklui ai fuan sira hanesan salak, rambutan, saburaka, durian no avokate.