Sekretariu Estadu ne’e informa, sei haruka ekipa sira ba halo monitorizasaun ba eskola sira iha teritoriu tomak hodi detekta eskola ida ne'ebé mak la prense rekezitus sei taka tiha
"Ami sei haruka ekipa ba munisípiu sira para monitór eskola sira ne’ebé mak iha informasaun loke sein koñesimentu husi Ministériu Edukasaun ita haree ba eskola sira ne'ebe mak la prense rekézitus ne’e ita taka tiha," dehan nia iha Colegio SENOFA, Balide (23/01)
Nia hatutan, eskola ne'ebé la prense rekézitus taka tiha tanba sira lakohi kria tan profesor kontratadu no voluntáriu barak iha eskola.
"Tanba komunidade sira loke eskola depois kria tan profesór voluntáriu, ne’ebé ami sei haree ida ne’e ho rigorozu oituan atu haree para eskola sira ne’ebe mak loke sein koñesimentu husi Ministériu Edukasaun ne’e ita sei haruka para, no eskola ita seidauk detekta maibé tempu badak ita-nia ekipa sei tun atu halo monitor," hatutan nia.
Nia informa, loke eskola tenke prense rekézitus, tenke iha infraestrutura liuliu iha profesór sira.
"Agora imi loke tiha eskola ida, profesór la iha depois infraestruta la iha, ba escola iha uma kikoan ida mak hakarak tenke rekruta voluntáriu sira ba ne’e, ne so para atu kria konfuzaun de’it tanba ne’e mak Ministériu Edukasaun sei foti medidas regirozu ba asuntu ida ne’e" afirma nia.
Aliende ne'e, relasiona ho profesór kontratadu sira-nia ejijénsia katak se ME aloka fali profesór seluk ba eskola mak sira sei la fó fatin tanba eskola balun ne’e ho sira-nia esforsu hamutuk ho komunidade tomak mak harii no hatana ba ejijensia ne'e Sekretariu Estadu hatete, la iha ema ida mak intervén bainhira ME rekruta profesór foun.
"Kona-ba profesór sira ne’ebé atu rekruta foun mak sira simu ka la simu nee la’os problema, eskola ne’e la’os ó mak funda, kuandu o loke eskola ne’e kabe ona ba responsabilidade ministériu edukasaun la’os komunidade nia, se komunidade nia entaun komunidade mak tenke halo investimentu. Se investimentu mak komunidade la tau buat ida no buat hotu-hotu deit nee klaru escola ne'e ministériu edukasaun nia. Ne’ebé la iha profesór ida mak atu interven dehan eskola ne’e ha’u mak funda ne’ebé labele rekruta tan ema seluk mai"Nia hakotu.
