Sekretáriu Estadu Asuntu Toponímia no Urbana, Germano Santa Brites Dias, husu ba vendedores sira iha trotoar leten, dalan públiku, inklui komunidade ne'ebé hela iha tasi ibun no mota ninin tenke muda ona ba fatin ne'ebé governu prepara.
Nia dehan, komunidade sira ne'ebé simu ona notifikasaun husi Prezidente Autoridade (PA) tenke prepara ona sira nia sasan hodi muda.
“Governu fó ona notifikasaun, se mak senti an dehan notisikasaun ne’e mate ona ne’e hatudu katak hein ezekusaun mai, governu fó dala ida ou rua hotu ona, lei mak obriga ami atu halo servisu ekipa tutuir la halo servisu ida mesak-mesak ida ne’e,” dehan Sekretariu iha Edifisiu MAE, Tersa (09/04).
Governante hatutan, ba komunidade, negosiante, loja na’in ne'ebé estraga trotoar atu re-konstrui fila-fali ba nia estandar orijem, no komunidade harii kualker kontrusaun iha valeta leten husu tenki hasai ka sobu.
“Komunidade ne’ebe maka ke'e rai iha foho lolon hodi konstrui uma no prejudika ba sendimentasaun iha sidade, tenke hapara, komunidade sira hela iha pertense tasi ibun, Bebonuk to'o Pertamina Internasional husu atu hamamuk ona fatin refere, komunidade hela pertense Comoro mota ibun to iha Ponte Comoro II tenke hamamuk fatin refere,” nia hato’o.
Nia afirma, Vendedores ambulante faan ikan iha tasi ibun, tenke muda hotu ba merkado, labele faan ikan iha nahe uza hudi tahan iha trotoar leten.
Tanba, ema hotu hakarak hela iha ambiente ida ne'ebé moos, la iha foer organizadu katak buat hotu tenki hatur tuir ida-idak nia fatin, liliu utilizasaun ba espasu públiku sira tenki tuir nia funsaun.