Saudozo ‘Domi’ Hakotu Iis Tanba Moras Komplikadu Featured

By Saturnina da Costa Novembru 13, 2021 669
Matebian Koronel ‘Domi’. Matebian Koronel ‘Domi’.

DILI:Tanente Koronel Saudozo Domingos da Costa dos Santos ‘Domi’, hakotu iis tanba sofre moras komplikadu.

“Nia uluk halo tratamentu iha Portugál, tanba moras fuan, tensaun, no iis boot, entaun foin dadaun, ita enfrenta hela situsaun Covid-19 ne'ebé nia ladun fó atensaun ba moras hirak ne'e entaun moras ne'e komesa fali to’o ohin nia hakotu iis, iha ICU HNGV”,Xefe Gabinete Forsa 2020 Falintil-Forsa Defeza Timor-Leste (F-FDTL), Capitão Mar de Gerra, Higinio das Neves, iha HNGV, sábadu (13/11).

Matebian Koronel ‘Domi’ hahú halo tratamentu ba nia moras durante fulan ida semana rua.

“Matebian enfrenta moras kuaze fulan ida semana rua, fofoun moras nia iis la normál, entaun ami-nian médiku militar nian,  Kapitaun Mendes akompaña nia mai iha HNGV hodi teste Swab no nia pozitivu  covid-19, entaun doutor sira lori ba izolamentu Lahane”, informa nia.

Bainhira to’o Lahanene matebian kondisaun di’ak, depois semana ida ho balun matebian nia kondisun gravé liután, no Doutór sira troka malu fó tratamentu, maibé situsaun aumenta gravé no doutor sira tau Ventiladór.

Molok ne'e doutór sira tau ventiladór ba matebian, nia sei ko'alia ho Vise Xefe Estadu Maior Jenerál Falur Rate Laek hodi relata nia kondisaun, maibé nia responde katak buat hotu entrega ba Maromak. 

“Entaun família no ha’u rasik semana rua liuba deside transfere nia husi izolamentu Lahene mai iha ICU HNGV to’o ohin nia hakotu iis”, dehan nia.

Kapitaun Neves, sente triste tanba lakon nia belun di’ak ida ne’ebé durante ne’e hamutuk nafatin.

“Triste boot tanba ha’u lakon ema ne’ebé loroloron la’o ho ha’u iha tempu ida ne’ebé difísil ami nunka husik malu. Maibé tanba de’it Corona ha’u labele kaer nia liman ha’u só haree de’it husi dook”, espresa nia.

Tanente Koronel Domigos da Costa dos Santos ‘Domi’, moris iha Lospalos-Lautein (1/1/1965).

Bainhira levantamentu iha tinan 1983 iha Mehara ne'ebé lidera husi Komandante Cuba ' Raja Miguel', Saudozo ‘Domi’ sei idade joven liu hamutuk ho Komandante Neves deside halai ba ai-laran ho sira seluk hamutuk ema sia nolu resin.

Hafoin funu ramata iha tinan 1999, na’in 6 de'it mak konsege moris inklui Saudozo ‘Domi’ hodi tuun mai vila. Nia ativu fali iha vida militar Instituisaun F-FDTL iha tinan 2001, too hakotu iis iha sábadu ohin iha oras 10:23 dader hafoin halo tratamentu intensivu iha ICU HNGV Dili.

Durante karreira Militar Matebian mós assume kargu nu'udar Adidu Militár iha Portugál no dadaun ne’e, halo kna’ar iha Kuartel Komandu F-FDTL Fatuhada-Dili.

Matebian nia isin mate hatoba ona iha nia rezidensia Matebian Luru Mata hodi hein seremónia funebre tuir mai.

Saudozo ‘Domi’ husik hela nia espoza ho nia oan sira.

Naldo Rei, Hamutuk ho Saudozo ‘Domi’ iha Paicau

Ami nia jornada hamutuk iha Foho Paicau nia sorin bainhira Nino Konis Santana ho Keri Laran Sabalae haruka ha'u ba halo filmajen guerilheiros FALINTIL rejiaun no 1 Ponta Leste iha 1994.

Ha'u apriende buat barak husi sira. Domi ne'ebé sira hatudu ba rai doben Timor-Leste nunka bele kompara ho buat seluk. Iha 1992 Bainhira ha’u nia maun Doben Hadomi Timor halai ba ai-laran, sira na’in rua sempre hamutuk too ha’u nia maun mate iha Paicau.

‘Domi’, joven ida ho determinasaun boot tebes hodi luta hamutuk ho Falintil sira seluk iha Ai-laran. Bainhira levantamentu iha 1983 iha Mehara ne'ebé lidera husi Komandante Cuba 'Raja Miguel', Domi sei idade joven liu hamutuk ho Komandante Neves (atual Xefe Gabinete Forsa 2020 Falintil-Forsa Defeza Timor-Leste (F-FDTL), deside halai ba ai-laran ho sira seluk hamutuk ema sia nolu resin.

Bainhira funu ramata, nain 6 de'it mak konsege moris inklui Komandante Neves. Ohin ita lakon ema diak ida, eroi boot timoroan nian saudozu DOMI.

Deskansa ho hakmatek ba rohan-laek funu-nain no aswain Timor-Leste nian. Ita-nia isin lolon mak mate tanba eroi nunka mate!

 

Rate this item
(0 votes)
Last modified on Sábadu, 13 Novembru 2021 22:01

Independente Digital TV

Tuir ami iha Twitter

Kalendariu Notisia

« June 2024 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30