Sarani Baukau Alice da Costa, hatete, kada tinan bainhira selebra festa natal, Saudozu Dom Básilio mak halo misa, maibé tinan ida ne’e Amo parokia hamutuk ho Amo sira seluk no sarani sira deit. Ho ida ne’e, hanesan tristeza boot ida ba sarani Dioseze Baukau.

“Ami sente triste tinan ida ne’e Amo Bispo lahamutuk ho ami sarani Dioseze Baukau, hodi selebra loron natal ne’e,” dehan nia hafoin selebrasaun misa natal iha Igreja Katedral Santo Antonio, Baukau, sesta ne’e (24/12).

Iha fatin hanesan, José Ximenes, hanesan mós sarani parokia Baukau, hatete, buat hotu maromak nia planu, maske Dom Básilio lahamutuk ona ho sarani sira, maibé nafatin selebra loron natal ho haksolok.

“Sim, ami triste tebes, maibé ita atu halo oinsa buat hotu maromak nia planu no nia mak sei deside,”dehan José.

Nia hatutan, maske nune’e, sarani sira sei lalakon vontade no esperansa atu selebra loron natal ne’e.

Administrador Dioseze Baukau, Padre. Alipio Pinto hatete, kalan natal ida ne’e, senti hanesan oin seluk no esperensia primeiru ne’ebé koko iha nia moris, bainhira selebra natal hamutuk ho sarani sira.

“Natal ida ne’e, ha’u hanoin ba ita boot sira oin seluk no mós ba ha’u, esperensia primeira ne’ebé ha’u koko iha ha’u nia moris, bainhira selebra natal hamutuk ho ita boot sira,”dehan Pe, Alipio.

“Ohin kuando ha’u tama mai rona lian ida hanesan ne’e, kala ómilia laos hanesan ona ho tinan kotuk kuando Dom Básilio hamutuk ho imi selebra natal, ha’u senti fuan ne’e kiik uituan, kala sarani sira lakohi rona ha’u nia lian, mais pasensia Dom Básilio lahamutuk ona ho ita boot sira kalan ida ne’e, no ha’u hamrik iha ne’e atu partilla liafuan ruma husi evanjello no leitura sira ne’ebé ohin ita rona,”tenik nia.

Tuir nia, ema mak lahanesan maibé leitura no evanjello tinan-tinan sempre hanesan, tanba ne’e hakarak partilla pontus balun ba leitura sira ne’ebé ohin rona iha natal ida ne’e.

Nia akresenta, husi leitura sira ne’e konvida sarani sira atu halo transformasaun, renovasaun ba ema ida-idak nia moris no halakon odio, vigansa no halo mudansa ba ida-idak nia-an.

Entretantu, Saudozu Bispo Dom Básilio do Nascimentu hakotu iis iha loron 30 fulan-Outubru tinan 2021, iha Óspital Nasionál Guido Valadares (HNGV), tanba sofre moras fuan.

Enkuantu, Saudozu nia isin mate halot iha Igreja Katedral Santo Antonio Baukau nia laran, iha loron 4 fulan-Novembru tinan ne’e.