Item 15 ne’e Sali-Magu sei entrega ba INFPM tanba aimoruk hirak ne’e kontein Narkotik-Psikotropik ka droga.

Diretór Nasionál Farmasia no Mediku, Ministériu Saude (MS), Delfin Fereira informa, MS no kompaña Sali-Magu halo ona diskusaun kona-ba aimoruk item 15 ne’ebé kontein Narkotik-Psikotropik.

Delfin hatete, aimoruk ne'ebé tama kategoria Narkotik-Psikotropik ne'e kompaña Sali-Magu labele importa no labele rejista, entaun tenke fó fila ba INFPM hodi sosa direita.

"Ida ne'e ha'u rona ona katak sira iha diskusaun atu osan ida ne'ebé tama ba iha aimoruk 15 item ne'e fó fila fali ba INFPM hodi INFPM mak sosa direita," dehan Delfin iha Suai room, Timor Plaza, Kinta (18/04).

Molok ne’e, Diretór Kompaña Sali-Magu, Sansão Gomes hatete, nia parte haree hela oinsa atu husu ba Ministériu Saude (MS) hodi hasai aimoruk item 15 husi kontratu tanba aimoruk hirak ne’e tama iha kategoria droga.

“Uluk bainhira oferese ba emprezariu barak, hotu-hotu retira. Tanba nia prosesu ne’e la fasil, nasaun sira ne’ebé produs ne’e sira la halo esportasaun enkuantu ita-nia governu la fó ba sira buat ne’ebé bolu Import Permit,” dehan Sansão ba Jornalista INDEPENDENTE, iha nia knar-fatin, Delta I, Kinta (29/02).

Iha fulan kotuk, nia dehan, nia parte koko haruka kart aba Diresaun Nasionál Medikamentu no Farmasia, Ministériu Saude, atu hasai Import Permit ba aimoruk item ida de’it, nune’e sira bele haruka ba nasaun sira ne’ebé produs aimoruk ne’e. Maibé fulan ida ona DNMF seidauk hasai dokumentu refere.

“Ne’ebé agora ami hanoin hela, ami atu halo fali karta ida ba Ministériu Saude, karik 15 item ne’e hasai tiha husi kontratu, tanba defisil tebes.”

“Tanba tuir sira informa mós katak, tuir dekretu lei ida hatete aimoruk sira ne’e so governu mak direitamente sosa.”

“Ne’ebé ami sei tenta atu hato’o pedidu ba, se lei hatete hanesan ne’e duni, husik ba governu mak direitamente sosa, hasai tiha de’it husi ami-nia kontratu par labele difikulta fali sasan sira seluk ne’ebé ami bele hatama,” dehan Sansão.