DILI: Ekipa Futeból Femenina S'amuser Football Club (Fc), susesu sai kampiaun ba Primeiru Divizaun Liga Futeból femenina Timor-Leste (LF-FTL), epoka 2025, hafoin empata ho nia adversáriu ekipa AD SLB ho golu 0-0, iha kampu futeból Demokrasia Dili, domingu ne'e.
Klubu S'amuser fahe pontu ho nia adversáriu AD SLB no aumenta pontu sae ba 45, iha tabela klasifikasaun jogu primeira divizaun LF-FTL. Enkuantu AD SLB aumenta de'it pontu ba 43, nune'e automatikamente S'amuser sai kampiaun ba kompetisaun jogu LF-FTL epoka 2025-2026 nian.
Iha jogu primeira parte, AD SLB domina liu jogu, hodi lansa xutu ameasa barak maibe liga defeza S'amuser la fo oportunidade ba AD-SLB atu produs golu ruma.
Ekipa ne'ebé lideradu husi Treinadór Filomeno Junior ne'e hatudu mental jogu kompetetivu, nune'e bele produs golu hodi gaña vitoria, maibe to'o minutu 45 termina ekipa rua hela ho skore 0-0 empata.
Hakat ba segundu parte, AD SLB kontinua domina bola no hatudu performa ne'ebe di'ak hodi lansa xutu barak liu, maibe sutu sira ne'e sei antisipa husi rede S'amuser nian.
Ho rezultadu empata ne'e, ikus mai Ekipa AD SLB tenke hankaneak ba S'amuser nia vitoria hanesan kampiaun.
Prezidente FFTL, Nilton Telmo Gusmão, apresia ho partisipa klubu sira nian iha LF-FTL. Nune'e ohin bele hetan ona ekipa ne'ebe kampiaun.
“Ita konsege konklui ita nia primeiru epoka ho di'ak no ohin ita hetan ona kampiaun ba atividade Liga Futeból femenina Timor-Leste mak ekipa S'amuser. Nune'e Hau hato'o parabéns ba estrutura klubu inklui jogador sira hotu, tanba sira nia esforsu no dedikasaun mak ohib sai nu'udar kampiaun,” Katak nia ba jornalista sira, iha kampu FFTL Bairo dos Grilhos, Domingo (23/03).
Nia subliña, durante epoka ida FFTL organiza Liga Femenina, konsege produs jogadór lubuk ida ne'ebe ho kualidade.
“Ita espera katak atividade sira hanesan ne'e bele motiva liu tan feto nia partisipasaun iha futeból,” Katak nia.
Aliende, euforia partisipasaun sosiedade hadomi futeból boot tebes, ida ne'e enkoraja FFTL atu kontinua kria atividade futeból iha Timor-Leste.
Iha fatin hanesan, Sekretáriu Jerál ekipa AD SLB, Domingos Caero, parabeniza ekipa S'amuser, tanba sira esforsu ho defensive, nune'e AD SLB la konsege produs golu ruma.
“Maibe hanesan jerente klubu, ami louva ba ho ami nia jogadór, tanba hatudu jogu ne'ebe desesivu duni,” Nia dehan
Maibé, nia dehan, iha jogu 90 minutu AD-SLB domina jogu, maibe sorte mak la iha ida ne'e mak lalaok futeból nian.
“Maibe hanesan Jerente Klubu, ami louva ba ho ami nia jogadór sira, ami mos prepara ona planu oinsa hasoru Liga ne'e sei akontese iha fulan-juñu mai,” Nia dehan.
Entretantu Kapitaun Ekipa S'amuser, Odelida Martins subliña, kampiaun ne'ebé ekipa hetan, tanba suporta másimu husi familia no adeptus sira.
“Ha'u hakarak hato'o obrigadu ba adeptus sira no mos ba ha'u nia familia ne'ebé mak apoiu masimu tebes ba ami, nune'e ohin ami bele sai kampiaun,” Nia espresa.
Kapitaun ne'e promete, sei kontinua fó motivasaun ba jogadór U-17 no U-23 ne'ebe inklina iha ekipa referidu, atu kontinua hatudu performa ne'ebe di'ak iha jogu epoka 2026-2027.
Purtantu Ekipa Kampiaun S'amuser hetan premiu hanesan medalla, tasa LF-FTL no osan ho monatante rihun $15.000.00 ho trofi ida.
FFTL deklara LF-FTL daruak se akontese Juñu
Purtantu, Prezidente Federasaun Futeból Timor-Leste (FFTL), Nilton Telmo Gusmão, deklara epoka daruak Liga Futeból femenina Timor-Leste (LF-FTL) sei kontinua hikas iha fulan-Juñu tinan ne'e.
“Nudar prezidente, Ha'u solisita ba asosiasaun futeból femenina atu kontinua organiza ita nia epoka daruak iha fulan-juñu nia laran,” Katak nia.
Aliende ne'e, nia mos enkoraja klubu sira atu kontinua prepara an, nune'e bele kompete di'ak liu tan iha epoka daruak 2026-2027.
“Ha'u husu klubu hotu-hotu, atu nafatin prepara an, nune'e bele kompete iha epoka daruak ne'e sei akontese iha fulan-juñu ne'e, atu ita bele hadi’a ita nia futeból iha ita rain,” Nia informa.
Tuir nia, dadaun ne'e euforia futeból femenina la diferente ona ho futeból mascolinu nian, tanba ohin loron futeból femenina atmosfera diferente tebes.
“Ita haree Futeból Femenina ohin loron iha mundu nia atmosfera ida diferente, futeból ida ne'ebe kampta tensaun ema nian, liu-liu sosiedade hadomi futeból,” Nia esplika.
Lideransa Masimu FFTL ne'e, hatutan nia parte simu ona rekomendasaun husi Asosiasaun futeból femenina, no iha ona konkluzaun ida katak tinan ne'e sei redus numeru klubu husi 10 ba klubu 8 de'it.
“Atu ita bele hetan klubu sira ne'ebé iha kondisaun, atu bele iha kompetisaun ida másimu liu tan, nune'e ba epoka daruak ha'u fiar katak ita sei organiza atividade ne'e di'ak liu tan,” Nilton hakotu.
