Sekretáriu Estadu Komunikasaun Sosiál (SEKOMS), Expendito Dias Ximenes informa, prosesu revizaun ba alterasaun lei komunikasaun sosial dadaun sei iha prosesu diskusaun ho orgaun regulador husi Konsellu Imprensa KI Timor-Leste molok halo konsultasaun ba públiku.

"Lei komunikasaun sosial agora ita iha ona prosesu revizaun hamutuk ho Konsellu Imprensa KI Timor-Leste la'o hela tempu besik ami sei halo audensia públika ho sosiadade sivil media nain no Asosiasaun jornalista sira, hafoin lori ba konsellu Ministru halo apresiasaun ita, depois aprezenta ba Parlamentu Nasionál para halo diskusaun no aprovasaun," dehan Expendito ba jornalista INDEPENDENTE, hafoin remata enkontru Konsellu Ministru iha Palasiu Governu (12/02).

Nia dehan, iha prosesu diskusaun ne'e haree lei komunikasaun sosial iha artigu balun presiza halo alterasuan, tanba lei ne'e produz iha tinan 2014 to'o agora iha mudansa teknolojia presiza hadia iha artigu balun hasai no aumenta tua fali artigu Foun ilha laran.

"Artigu  ne'ebé Ita hatama Tan lei komunikasaun sosial nee mós Ita halo diskursu sei jaree tuir evolusaun mudansa teknolojia iha Timor-Leste, tanba ne'e ami agora halo preparasaun hela ba prosesu alterasaun lei komunikasaun sosial ne'e," hakotu nia.

Antes ne'e iha 14 Fulan Novembru tinan 2024 estrutura Konsellu Imprensa KI Timor-Leste hala'o ona audensia ho Sekretáriu Estadu Komunikasaun Sosiál SEKOMS hodi ko’alia kona-ba kuadru legál “Lei Komunikasaun Sosiál” ne’ebé tama iha planu atu halo revizaun.

Hafoin enkontru Prezidente Konsellu Imprensa KI Timor-Leste entrega  kona-ba esbosu alterasaun lei komunikasaun sosiál ba sekretáriu Estadu Komunikasaun Sosiál, nune'e rua  konkorda hamutuk katak parte legál husi instituisaun rua ne’e kontinua komunika ba malu hodi bele hare hamutuk kona-ba revizaun lei refere.