Primeru-Ministru Kay Rala Xanana Gusmão husu bá embaixadór Kay Olo atu bainhira hamutuk ho joven sira tenke muda mentalidade, harii karakterístika foun.

Iha tinan-tolu ne’e, la’ós atu prepara foin-sa’e sira atu sai hotu ministru maibé atu fó netik hanoin ida katak Timor sei iha joven sira-nia liman no kabás.

Primeiru-Ministru konta katak, Kay Olo presta ona esforsu balun iha PLAN Internasionál ho joven sira no fó hanoin bá joven sira atu fiar bá aan rasik.

“Ha’u tenke dehan loloos katak la’ós tanba nia ha’u-nia oan ne’e mak hetan previléjiu sira ne’e, maibé, ha’u bele hanorin sira na’in-tolu atu esforsu mesak. Bainhira sira sei kiik ha’u fó han oitoan, depois sira-nia inan moras bá tiha iha Austrália la hetan osan, servisu NGO mak ajuda netik oitoan. Sira nunka hetan apoiu hosi ha’u nu’udár aman. Ne’e la’ós tanba la gosta sira, maibé tanba ha’u gosta sira mak ha’u halo hanesan ne’e. Ha’u hakarak iha sira-nia mentalidade tenke esforsu rasik,” dehan PM Xanana liu husi Komunikandu ne'ebé Online INDEPENDENTE asesu iha Pájina ofisiál GPM, Sesta (14/02).

Xefe Governu ne’e konta-tuir katak, oan mane Alexandre oras-ne’e daudaun servisu iha Aeroportu Austrália nian hanesan tula sasán sira lori bá aviaun. Kay Olo foin lalais iha IX Governu Konstitusionál tama servisu iha Ministériu Obras Públiku maibé haruka sai tiha atu evita ema dehan, tanba aman Primeiru-Ministru nune’e oan bá servisu iha ne’ebá.

“Ida-ne’e maneira ida atu hanorin no ha’u kontente tanba sira na’in-tolu esforsu an mesak. Ida-ne’e lisaun hosi ha’u-nia an rasik tanba uluk ne’e iha tempu kalan ha’u tenke bá tiha ikan hodi buka osan atu selu eskola iha Liceu,” Xanana  haktuir.

Ho lisaun no esperiénsia moruk sira hanesan ne’e maka sai forsa bá Kay Rala Xanana Gusmão hodi hamosu karákter foun atu nia bele enfrenta problema no bele intende ema seluk nia susar.

“Tanba ne’e, bá ha’u-nia oan na’in-tolu maski ha’u Primeiru-Ministru, maibé sira nunka simu fulan-fulan, ida-ne’e atu hanorin sira. Bainhira ha’u hetan buat ruma ha’u utiliza hodi ajuda fali ema seluk,” PM subliña.

Líde nasionál ne’e orgullu ho papél PLAN Internasionál nian tanba muda mentalidade foin-sa’e sira nian liu-hosi programa oioin.

Iha fatin hanesan, Diretora Interina PLAN Internasionál, Fátima Estrela Soares hateten, PLAN servisu hamutuk ho Kay Olo tinan tolu bá oin tan, atu haree oinsá foin-sa’e sira bele sai ajente transformasaun bá-aan rasik no foin-sa’e sira seluk.

Nune’e, atu haree liután oinsá promove servisu entre joven ho joven, hodi sai modelu ida bá labarik sira no mós haforsa rede servisu entre joven sira iha Timor, oinsá haforsa abilidade lideransa bá foin-sa’e sira atu bele halo krítika ida ne’ebé ho solusaun estratéjiku.

Embaixadór Kay Olo, partilla esperiénsia durante hamutuk ho PLAN Internasionál katak, aprende buat foun barak.

“Ha’u sente previléjiu tebtebes no hatene ho di’ak maioria foin-sa’e sira iha Timor seidauk asesu bá oportunidade ne’ebé ha’u hetan. Agradese bá PLAN Internasionál bá konfiansa ne’ebé fó mai ha’u hodi assume responsabilidade ida-ne’e,” Kay Olo agradese.

Kay Olo hameno bá foin-sa’e sira iha Timor laran tomak atu unidade hodi hateke bá oin tanba futuru Timor nian iha foin-sa’e sira-nia liman.