Nia dehan, Xefe Estadu mós fó apresiasaun boot tebes bainhira selebra iha tempu natál nian to'o anu novu remata no ikus fali mai mós la akontese buat ida.

“Xefe Estadu fó apresiasaun bo'ot ida ba joven sira hotu no responsavel grupu arte marsiais no arte rituál sira hotu ne'ebé depois hasai tiha desizaun suspende sira-nia atividade komesa diminui,” dehan PM Xanana, iha Palasiu Prezidensiál, Bairru-Pité, horisehik.

Nia hatete, tanba ne’e Xefe Estadu dehan joven sira, bele fiar katak ho joven sira nia partisipasaun ne'ebé ho konxiénsia tebes bele hanoin daudauk ona oin nusa mak bele hadi’a rai ne'e.

“Ami ko'alia mós kona-ba seguransa no apresia ida ne'e husi ministériu no membru sira KSDS mós fó apresiasaun daudauk ona kona-ba seguransa nasionál nian liu-liu hareee krime organizadu, money laudry, tráfiku umanu no kona-ba droga, ne'ebé Xefe Estadu iha husu atu ita hotu-hotu atensaun ba ida ne'e,” hatete nia.

Nia afirma, imi jornalista sira mak hatene karuk dehan ema iha ne'eba ne'e konsumu droga no faan droga iha ne'e ka iha ne'eba fó hatene ba polísia no ministériu sira kompetente atu la'ós ba kaer baku soe hela maibé lori mai atu rezolve tiha kazu sira ne'e.

Entretantu, membru Konsellu Superiór Defeza no Seguransa (KSDS) ne’ebé partisipa iha reuniaun dahuluk ne’ebé prezide husi Prezidente Repúblika José Ramos Horta hanesan, Komandante Jerál Polísia Nasionál Timor Leste (PNTL), Komisáriu Henrique da Costa, Xefe Estadu Maiór FALINTIL-Forsa Defeza Timor Leste (F-FDTL), Falur Rate Laek, David Dias Ximenes ‘Mandati’ Duarte Nunes, Ministru Interiór (MI) Francisco da Costa Gueterres, Ministru Defeza (MD) Pedro Klamar Fuik, Júlio Tomas Pinto no Nuno Manuel Corvelo de Andrade Sarmento ne’ebé nomeadu husi Prezidente Repúblika.