Nia dehan delegasaun ekipa vatinakanu mai Timor-Leste foin lalais hasoru malu ona ho Ekipa traballu Seguransa ho defeza, akompaña husi Segundu komandante Jerál PNTL Komisariu Pedro Belo ho Xefe Operasaun F-FDTL Koronél João da Costa Esteves no amo kapelaun F-FDTL kapitaun Rui Gomes ne'ebé resposavel ba liturjia sira aprezenta ona, depois delegasaun ekipa vatinakanu apresia ba seguransa ho defeza nia preparasaun.

"Ida ne'e Ekipa traballu  sira halo ona aprezentasaun ba delegasaun ekipa vatinakanu, iha momentu ne'ebá ita nia segundu komandante jerál PNTL Komisariu Pedro Belo ho ita nia koordennador  Xefe Operasaun F-FDTL João da Costa Esteves akompaña ho amu kapelaun F-FDTL kapitaun Rui Gomes ne'ebé resposavel ba iha liturjia ita halo aprezentasaun kona-ba preparasaun seguransa iha Timor-Leste atu simu vizita amu papa Francisco mai Timor-Leste iha fulan setembru, entaun sira apresia tebes ba ita nia preparasaun seguransa ho defeza," Dehan Henrique ba jornalista sira iha Kuartel Jenerál F-FDTL Fatuhada Dili (10/06).

Nia informa, delegasaun ekipa vatinakanu apresia ba preparasaun seguransa ho defeza, maibé parte rua kontinua buka hadia prakeza no faillansu sira atu hadia molok simu amu papa Francisco vizita mai Timor-Leste iha fulan setembru nia laran.

"Ita aprezenta ba delegasaun ekipa vatinakanu sira apresia ita nia preparasaun, sira, maibe parte ami seguransa ho defeza ami hakarak buka atu hadia ami nia prakeza no faillansu sira ne'e atu hadia halo preparasaun masimu to'o loron vizita amu papa Francisco labele mosu insidente," informa nia.

Nia afirma, parte Seguransa ho Defeza prepara di'ak ona kontinua mellora di'ak liu tán no ida ne'ebé sei falta buka atu hadia ho di'ak, tanba ne'e xave ba susesu iha eventu boot ida ne'e mak koordenasaun ho komunikasaun prinsipal ba iha komisaun organizadora.

"Ami sira iha seguransa ho defeza iha buat ruma ami ko'alia ba malu ho di'ak para ita prepara ita nia kondisaun, se ita mak iha kooperasaun ho koordenasaun di'ak, kuandu iha difikuldade ruma ita halo komunikasaun ba malu ne'e importante para ita utiliza meius sira ne'ebé mak iha ne'e ita fo solusaun," hakotu nia.

Molok ne'e Ministru Interior Francisco Guterres hateten, ekipa Vatikanu halo ona reuniaun ho MI kona-ba preparasaun seguransa ba vizita Papa Francisco nia mai Timor-Leste no iha reuniaun ne’e ekipa vatikanu apresia tebes ba seguransa Timor-Leste tanba tuir estandarte internasionál.

“Portatu seguransa laiha problema ,sira kontente ho ita nia prosesu ne’e sira kontente tanba ita nian seguransa lao di’ak, agora importante mak ita tenke kontinua kordena ho sira para sira halo servisu di’ak liu tan, oinsá kordena no komunikasaun ho sira para buat hotu lao di’ak,” Dehan Francisco ba Jornalista sira hafoin partisipa seremonia pose ba kargu Xefia Ministeriu Interior nain 92 ne’ebé halo iha iha Delta Nova sabadu foin lalais ne'e.

Nia dehan  ekipa vatikanu halo ona enkontru dala rua ho Ministeriu Interior hodi koalia konaba preparativu seguransa Amu Papa nia vizita mai Timor-Leste.

“Ami hasoru malu ona, ami enkontru dala rua ona no kolaia kona-ba kestaun seguransa Amo Papa nia, liu liu seguransa ba komunidade sira ne’ebé mai tuir peregrinasaun, ita aprezenta hotu kestaun ne’e ba sira no sira apresia ba ita laiha problema,  sira haree ita nian preparasaun seguransa ba Amo Papa sira kontente tebes  no sira dehan ita seguransa standar ne’e mós hanesan standard internasionál," hakotu nia.