“Ko'alia kona-ba referendu presiza iha lei. Se ko'alia kona-ba eleisaun antesipada, ha'u hanoin fila-fali Konstituisaun, dalan seluk ne'ebé Prezidente Repúblika bele halo”, dehan Diretór Ezekutivu AJAR, José Luis Oliveira, bainhira hamutuk ho ekipa RENETIL hasoru Prezidente Repúblika, iha Palásiu Prezidensiál, Bairru-Pité, horisehik.
Tuir nia, Prezidente Repúblika bele foti medida balun no antesipa buat balun hodi evita situasaun ne’e. Eleisaun antesipada karik mais solusaun ida maibé ne’e últimu rekursu, iha buat seluk Prezidente Repúblika bele halo.
Tanba ne’e, iha parte balun José Luis lamenta ho argumentu balun ne'ebé iha públiku katak Prezidente Repúblika hanesan símbolu de'it, maibé iha sistema ne’e, Prezidente Repúblika iha knaar importante nomeia Primeiru Ministru no fó pose membru Governu.
Haree ba situasaun ne’e sai komplikadu, organizasaun massa RENETIL mai apoiu Prezidente Repúblika atu uza ninia knaar ne’e bele garante Governasaun ne'ebé di'ak no estavel.
Tan ne’e, Xefe Estadu tenke buka medida ida ne’ebe atu buka solusaun tenke hala’o diálogu ho lider antigu no lider rezisténsia sira, atu buka solusaun diak.
