Xefe Governu ho satisfasaun bo’ot tanba bele partisipa iha eventu signifikativu lansamentu Relatóriu Ekonómiku hosi Banku Sentrál, kona-bá Dezenvolvimentu Ekonómiku Timor-Leste nian iha tinan 2024.
Xanana Gusmão konsidera Relatóriu ida-ne’e fornese análize ida ne’ebé abrajente hosi trajetória ekonómika nasaun nian, oferese prespsaun valiozu kona-bá progressu ne’ebe Estadu ne’e halo, dezafiu sira ne’ebé mak kontinua enfrenta no mós asaun estratéjika sira hodi alkansa kresimentu sustentável ida no inkluzivu.
Kresimentu Ekonómiku Timor-Leste ne’ebé aleseleradu iha tinan 2024 hosi 4,0%, sai hanesan melloria ida ne’ebé iha relasaun ho 2,4% ne’ebé rejistradu iha tinan 2023.
“Ida ne’e refleta ita nia esforsu koletiva iha fortalesimentu prinsipal kona ba impulsionadór ekonómiku sira, prinsipalmente husi meiu espansaun setór públiku, ne’ebé kontinua estimula atividade sira setór privadu nian,”dehan Primeiru Ministru liu husi nia diskursu iha lansamentu Relatóriu Dezempeñu Ekonómiku Timor-Leste 2024 iha Auditóriu Kay Rala Xanana Gusmão, Ministériu Finansas, sesta (21/03/2025).
Iha fatin hanesan, Governadór Banku Sentrál, Helder Lopes hateten, Relatóriu Dezempeñu Ekonómiku 2024 fornese análize no informasaun komprehensivu kona-bá Timor-Leste nia progresu ekonómiku, dezafiu sira ne’ebé hasoru, no oportunidades ne’ebé iha.
“Iha 2024, Timor-Leste nia ekonómia hatudu rezilensia maske iha inserteza global. Ita haree ka hetan kresimentu ne’ebé dudu maka’as husi investimentu estratejiku sira no jestaun fiscal ne’ebé diak liu. Inflasaun kontinua iha kontrolu no ita nia setór finanseiru kontinua hametin hodi suporta negosiu no uma kain sira,” Helder Lopes hateten.
Maibé, Banku Sentrál mós identifika katak, dezafiu sira persiste ka iha nafatin. Nune’e, jestaun finansas públikas ne’ebé di‘ak liu tán, dezenvolvimentu seitór privadu, dezenvolvimentu seitór produtivu sira, hadi’a infraestrutura no kapitál umanu, no hametin di‘ak liu-tán funsionamentu indústria finanseira sai nafatin prioridades prinsipáis ne’ebé presija ema-hotu nia esforsu.
Banku Sentrál nafatin iha kompromisu boot atu dezenvolve no lori indústria finanseira hodi servisu hamutuk ho Governu, seitór privadu, no entidade relevante sira seluk atu hasa’e inkluzaun finanseira no promove polítika ekonómika sustentável ne’ebé kria empregu bá joven sira no fó benefisiu ba populasaun tomak.
Ba oin, atu Timor-Leste harii no hametin ekonomia ne’ebé reziliente, inkluziva, diversifikada, no sustentável, iha buat tolu ne’ebé esensiál tebes maka hametin Kolaborasaun; Foku bá dezenvolvimentu seitor produtivu sira liu hosi maximiza alokasaun rekursus; no ho Konsisténsia no kontinua implementa politíka no programa ekonómika ne’ebé hahú ona.
BCTL espera katak, Relatóriu Dezempeñu Ekonómiku Timor-Leste 2024 husi Banku Sentrál sei serve nu‘udár rezultadu diagnostiku kona-bá kondisaun ekonómia Timor-Leste, no informasaun iha relatóriu ida-ne’e sei tulun ita atu halo preskripsaun ne’ebe di’ak-liu hodi dezenvolve no hametin liu-tán ita nia ekonomia iha futuru.
Banku Sentál kompremetidu atu halo públikasaun regulár hodi tulun atu hetan informasaun kredível no promove hahalok halo politíka bazeia bá evidénsia.
