Prezidente Bee Timor-Leste, Empreza Públiku (BTL,E.P), Carlos Peloi hatete, iha dezafiu boot tolu ne’ebé BTL,E.P. hasoru hodi fornese bee-moos ba komunidade sira, liu-liu iha kapital Dili.

"Primeiro mak ita-nia sistema sira ne'e tuan demais, ita presiza hadia, entaun ida ne'e dezafiu boot ida ba ami hodi jere sistema sira ne'ebé ke tuan. Segundo, sasan sira ne'ebé ita presiza halo meloramentu ba sistema sira eziste ne'e maioria ita tenke importa husi li'ur, ida ne'e mós lori tempu mak to'o iha ne'e, Terseiro, ita-nia rekursu (bee) rasik," dehan Carlos hafoin hasoru-malu ho Primeiru Ministru Taur Matan Ruak iha palasiu governu, Tersa (04/10).

Kona-ba rekursu bee, nia esplika, iha tempu udan bee iha rai okos barak, maibé iha tempu bailoron bee menus.

“Iha Dili (husi) 26 bomba ne'ebé iha, bomba balun agora bee iha rai laran menus signifika bee iha okos ne'e menus ona, tanba ne'e mak iha fatin balun bee ba sira simu oras 6 mais agora redus ba oras 4, balun oras 2 de'it tanba bee rai okos ne'e menus.”

“Agora bee husi rai leten, liu-liu parte Tuhumeta nian mós debitu ne'e menus, depois agora aumenta tan udan hanesan ne'e sistema sira ne'ebé iha labele trata tanba bee ne'e merak,” dehan nia.

Maske nune’e, Prezidente BTL,E.P ne’e hatutan, nia parte kontinua esforsu hodi bele oferese bee-moos ba komunidade sira hotu.

Daudauk ne’e, nia dehan, ekipa manutensaun kontinua serbisu meloramentu ba sistema sira ne'ebé eziste hodi garante fornsimentu bee ba komunidade sira.

"Ita rekoñese katak fatin barak iha Dili ita-nia komunidade balun seidauk asesu bee, ita kontinua esforsu par mantein ka jere sistema ne'ebé iha lori bee ba ita-nia komunidade.”

Esforsu seluk, nia hatutan, halo hela preparasaun hanesan planu integradu atu melora sistema bee-moos iha Dili ba tempu naruk nian.

“Na'in hira akompaña dezeñu detailladu halo hotu ona, BTL mós halo akordu ho Banku Mundiál par melora sistema bee-moos iha parte Dili Leste nian. Agora daudaun ami iha hela prosesu asina akordu ho ADB par finansia sistema bee-moos iha Dili Oeste nian,” dehan nia.

Kona-ba enkontru ho PM Taur, nia dehan, nia parte update serbisu BTL,E.P ba PM Taur no simu mós orientasaun balun husi Xefe Governu.

"Orientasaun primeiru mak fó hanoin ami kontinua halo operasaun manutensaun sistema sira boot iha Dili par bele garante bee ba ita-nia komunidade sira. Tuir xefe governu nia observasaun ita halo duni esforsu, mais presiza aumenta tan esforsu sira ne'e par bele aselera serbisu," nia dehan.

Aleinde ne'e, nia hatutan, iha area investimentu PM Taur orienta atu BTL,E.P halo koordenasaun di'ak ho parseiru sira hotu nune’e labele hasoru problema iha implementasaun.

“Halo esforsu atu ita sees husi ida ba kee, ida ba taka tiha, seluk ba kee fila fali, planu sira integradu ita tenke fokus par halo serbisu," nia dehan.

Molok ne’e, Komunidade ida husi aldeia Terus-na’in, Suku Vila Verde, Postu Administrativu Vera Kruz, Munisipiu Dili, Joanina dos Santos hatete, dezde tinan 2009 bainhira nia ho nia família bah ela iha aldeia Terus-nain, sira hasoru ona problema bee-moos.

“Ami iha ne’e uluk sira dada bee mai to’o iha ne’e, maibé tanba mangeira ne’e kiik loos no komunidade mós aumenta barak no balun supa bee ho sanyo entaun ami sira ne’e la hetan ona bee,” dehan Joanina ba Jornalista jornal INDEPENDENTE, iha área Ailok-Laran, Kuarta (14/09).

Atu bele atende ba nesessidade uma-laran, nia dehan, dala-ruma sira tenke sosa bee-moos husi bee-tanki ne’ebé ema fa’an.

“Uluk iha mangeira boot ida mak iha mota laran ne’e, maibé mota estraga tiha no bee agora maran tiha, ne’ebé hakarak ka lakohi ami tenke ba husu ba maluk balun ka tenke sosa.”

Iha fatin hanesan, komunidade seluk, Erina da Costa reforsa, komunidade sira ne’ebé hela iha mota sorin tenke ba kuru bee-moos iha fatin seluk.

“Dala-ruma ami ba kuru bee iha mota ulun ne’ebá, balun ne’ebé iha karreta hodi karreta, ami ne’ebé laiha lori de’it gerobak,” dehan nia.