Husi total orsamentu millaun $1.950 ne’ebé aloka ba sosa karreta foun ne’e, kada karreta sei sosa ho folin rihun $65.
Proposta sosa karreta ne’e hetan aprovasaun ho votus a favor 45, kontra ida no abstensaun 11.
Vise Prezidente bankada Fretilin, Antoninho Bianco husu atu lejislatura dalima di’ak liu foku ba objetivu saida mak atu halo no intrega sosa karreta foun ba lejislatura tuir mai.
"Agora ita sosa tan karreta, ha'u hanoin proposta ne'e elimina tiha, husik aban-bainrua Sexta Lejislatura mesak halo, ne'ebé Kinta Lejislatura ko'alia saida mak ita atu halo," dehan nia molok aprova orsamentu privativu PN, Segunda (03/10).
Vise Prezidente Bankada PLP, Francisco de Vasconcelhos preokupa ho folin karreta ne’ebé sa’e ona ba rihun $65.
Francisco dehan, PN bele kompleta karreta 30 nune’e deputadu na’in 65 bele sa’e karreta foun maibé tenke haree ba nia presu ne’ebé razoavel.
“Kompleta bele maibé nia presu ne'e razoavel ka lae? Presu ida uluk $40 mill depois agora $65 mill," dehan nia.
Tan ne’e, tuir nia atu labele hatodan liu pezu orsamentu PN nian, di’ak liu hasai tiha osan ba sosa karreta foun, husik aban-bairua deputadu foun mai mak haree fali nia orsamentu.
Prezidente Bankada CNRT, Duarte Nunes hatete, desizaun sosa karreta foun ba deputadu ne’e seidauk final, katak bele mosu proposta alterasaun iha diskusaun no aprovasaun Orsamentu Jeral Estadu 2023.
Maske nune’e, Duarte labele fó garante katak bankada ne’ebé nia lidera sei aprezenta proposta ida hodi hasai proposta sosa karreta foun ba deputadu sira.
"Sei iha desizaun ikus maibé ami sei konsulta malu tanba depende mós maioria ho minoria sei mosu iha PN tuir mai hola desizaun kona-ba situasaun ne'e," dehan nia.
Iha fatin ketak, Diretór Ezekutivu Asia Justice And Rights (AJAR), José Luís de Oliveira lamenta ho polítika PN atu sosa karreta foun iha tempu mandatu besik remata.
"Ida ne'e ha'u lamentavel tebes, tanba ne'e hatudu momoos ita-nia deputadu sira ne'e laiha sentidu patriotizmu, la hadomi nasaun ne'e, sira-nia polítika ne'e atu halo estadu monu ba rai kuak laran de'it. Tanba ita hatene ita-nia osan mina ne'e menus ba beibeik ona," dehan nia iha nia knar-fatin, Tersa (04/10).
Nia hatete, Banku Mundiál fó hanoin ona katak se TL kontinua gasta osan mak estadu ne'e la to'o tinan 10 bankarota ona.
Loloos, J. Luis dehan, osan mina ne'e gasta hodi investe ba buat ruma atu hetan reseita doméstika la’os gasta fali ba buat ida ne'ebé la fó benefisiu ba povu no nasaun.
“Se hadomi nasaun ne'e tenke halo polítika ida ne'ebé iha sustentabilidade, polítika ida ne'ebé hanoin ba aban-bainrua nian, polítika ida ne'ebé preokupa ho ita-nia oan beioan sira, la'ós buka haan hotu tiha de'it osan estadu nian ba interese privadu,” dehan nia.
Molok ne’e, Sekretariu Jeral Parlamentu Nasionál, Adelino Afonso de Jesus hatete, iha orsamentu privativu PN prevee ona osan ba sosa karreta foun.
"Tanba atu hola tan karreta 30, tanba karreta Pajero Sport 35 iha tiha ona, sosa tan 30 atu kompleta 65, ho razaun ida ne'e mak osan ne'e sa'e ba millaun $17," dehan nia, iha Parlamentu Nasionál, Kinta (29/09).
Kona-ba total osan ne’ebé prevee ba sosa karreta 30 ne’e, Adelino rekuza atu fó sai númeru.
"Karreta sei fó ba sira ne'ebé mak seidauk iha karreta, 35 ne'ebé mak sira simu ona, sira kontente ona ho pajero sport, agora ida mai ne'e hela 30 ne'ebé mak seidauk simu, sira bele simu," dehan nia.
Entretantu, iha tinan 2019, Parlamentu Nasionál sosa ona karreta Pajero Sport unidade 35 ba deputadu sira.
Karreta hirak ne’e distribui ba deputadu husi kada bankada, hanesan: Bankada Fretilin hetan karreta 12, CNRT hetan karreta 9, PLP hetan karreta 5, Khunto hetan karreta 3, PD hetan karreta 3, PUDD hetan karreta ida, UDT hetan karreta ida no Frente Mudansa hetan karreta ida.
