Portavóz komandu jerál PNTL, Superintendente Xefe, Armando Monteiro hateten, eventu internasionál Dili Maratona ne’e TL mak sai uma-na’in, tanba ne’e iha loron 08 fulan Outubru tuku 06:00 dader polisia sei taka totál dalan ne’ebé mak atleta sira halai liu.
Tranporte Públiku sira sei para hotu la halo movimentu durante eventu ne’e hahú to’o remata, hafoin bele normaliza hikas transporte públiku atu halo movimentu.
“Ita husu kondutór transporte públiku sira iha kapital Dili atu koopera no respeita autoridade seguransa ne’ebé mak sei koloka iha dalan sira atu kria páz ho estabilidade. Labele iha engarafamentu, tanba ne’e dalan ne’ebé mak atleta sira liu ita sei taka totál,” Armando Monteiro hateten ba Jornalista sira iha kuartél jerál PNTL, Kaikoli, Díli (04/10/2022).
Fatin ne’ebé mak realiza eventu internasionál ne’e hahú iha Palasiu Prezidensiál ho objetivu ida atu hametin páz no estabilidade, potensiál turístika TL nian iha mundu desportu no saúde, tanba ne’e rute ba atleta sira liu sei taka totál to’o eventu ne’e remata.
Estrada públiku ne’ebé sei taka totál atu hapara transporte labele halai mak hanesan estrada Públiku husi diresaun Ai-tarak laran , kruzamentu iha loja makikit, Fatuhada kontinua to'o Rotunda Prezidente Nicolau Lobato, fila tun ba Pantai Kelapa, Marconi, Palapasu, Kruzamentu Mandarin, Faról, Kolmera, Largo Lecidere, Ponte BJ Habibie, Bidau Santana to'o iha area Branca, fila fali mai Lecidere, Palasiu Governu, Kolmera, Mandarin, Palapasu no sei loke hikas bainhira eventu remata.
Informa ba transporte Públiku mai husi diresaun Maliana, Ermera, Likisá tama iha Tasi-Tolu, sei liu husi Golgota Ponte Comoro Tres, Covalima no Ainaro, Aileu tama Dili normál no parte leste liu husi Fatuahi, tama kapitál Dili, Bairru-Pité sei liu husi pasar tais Kolmera, inklui Ambulánsia no karreta funeráriu sira.
Tanba ne'e Komandu Jerál PNTL husu ba komunidade hotu nia Kolaborasaun no kontribuisaun hodi garante estabilidade no paz, iha eventu internasional Dili Maratona ne’e, tanba foin tinan lima ho situasaun Covid-19 foin hahu hikas fali atividade ne’e.
Komandu PNTL simu órdem despaixu ida husi komisaun organizadora ba eventu internasionál Dili Maratona bazeia ba ref 29/KO-DIM/IX/2022, 21 Setembru no karta casa militár ref 40/CM/IX/2022 22 fulan-Setembru tinan 2022 sei realiza aktividade ne’e iha loron 08/10 tuku 06:00 to’o remata.
Eventu Internasional Dili Maratona sei lansa ofisialmente husi Presidente Republika (PR) José Ramos-Horta iha Palasiu Presidensiál ho totál atleta 1000-resin kompostu husi nasional no Internasionál husi nasaun Kenya, Angola, Korea Sul, Malázia no Indonezia hamutuk 50 ho atleta timor oan sei harame eventu Dili Maratona iha kapital Dili.
PNTL sei hatun membru efetivu 1.500 mai husi komandu PNTL Munisipiu Dili rasik mak sei lidera apoiu husi kuartel jerál PNTL, ho komandu Munisipiu sira seluk inklu Unidade tolu.
