Casa Vida nu’udar organizasaun naun governamental ne’ebé durante ne’e hala’o serbisu sosial hodi tau-matan ba labarik no feto sira ne’ebé sai vitima. Atu bele selu ninia trabaladór sira, Casa Vida mós loke restaurante ida.

Maibé, hafoin pandemia Covid-19 no implementasaun EE, Casa Vida deside hodi hasai sira-nia trabaladór na’in 15.

Diretora Ezekutiva Casa Vida, Sujana Ximenes hatete, relasiona ho pandemia Covid-19, Casa Vida hetan difikuldade fundus, tanba doador sira mós la fó ona apoiu. Ho nune’e, nia parte deside hodi reorganiza an no fó liu prioridade ba labarik sira, tan ne’e sira deside hamenus mós númeru trabaladór.

Restaurante ne’ebé sira loke hodi ajuda selu traballador sira, nia dehan, ho situasaun Covid-19 halo rendimentu tuun tebes, nune’e defisil ba sira atu bele selu trabaladór sira.

“Akontese situasaun pandemia Covid-19 entaun atividade hotu para, no mós mosu inundadsaun boot ne’ebé estraga ba Casa Vida nia fatin ne’ebé loke restaurante, entaun agora dadaun taka. Casa vida fokus ba uma mahon de’it, ho ida ne’e mak hamenus tiha trabaladór ne’e,” dehan Sujana iha nia serbisu fatin, Bidau, Segunda (17/08).

Molok foti desizaun hodi hapara trabaladór 15, Sujana dehan, nia parte fó ona avizu preventiva loron 30 antes.

“Iha fulan Abaril (fó avizu preventive), to’o Maiu ami hapara sira tanba orsamentu mak laiha atu selu,” dehan nia.

Molok ne’e, Sujana dehan, nia parte mós bolu ona trabaladór sira hodi klarifika razaun saida mak hapara.

“Esplika ona ba sira katak Casa Vida nia fundus menus, esplika didi’ak ona ba sira orsamentu laiha, dala haat ona ba rezolve iha SEFOPE,” dehan nia.

Entretantu, iha Sesta (14/08) semana kotuk, Trabaladór na’in 15 ne’ebé Casa Vida hasai deklara parte kompaña hasai sira la ho justifikasaun klaru.

Trabaladora ida, Berta Ornai Neto informa, Casa Vida hasai trabaladór hahú husi fulan Marsu to’o Agostu, hamutuk na’in 15.

Trabaladór hirak ne’ebé hasai, nia hatete, balun hala’o ona serbisu durante tinan 10, maibé la hetan indinimizasaun.

Tan ne’e, nia parte ezije ba dirizente empreza Kafé Aroma no Casa Vida atu selu indinimizasaun tuir artigu 55, Lei númeru 4/2012.

Bainhira lakohi fó indinimizasaun tanba razaun finanseiru, trabaladór sira ezije atu re-emprega fali trabaladór na’in 15 ne’e.

“Se karik laiha dalan, husu rezignasaun husi Direitora Ezekutiva tanba laiha kapasidade atu rezolve problema organizasaun nian,” Berta hatete.