“Espesifikasaun tékniku tenke hakerek duni broken 15%, tanba ne’e kooperasaun bilaterál entre nasaun rua regra mak obriga duni katak tenke hakerek loloos hateten loloos saida mak iha saku nia laran, maibé públiku interpreta sala, bainhira foos aat entaun nia musan kinur ne’e mak dehan aat,” dehan nia, iha knaar fatin CLN, Mandarín, horisehik.
Tuir nia, espesifikasaun tékniku ne’ebé TL husu ba governu Vietname tau iha ne’e broken 15%, hafoin rezultadu iha ne’e hare foun 2020, husi ida ne’e hamosu sertifikasaun ida kompañia independentemente ida naran SCV-Vietname Lda, sira mak halo inspesaun halo teste laboratóriu kona-ba kualidade husi foos.
Sira produs dokumentu ne’e hatudu katak foos ne’ebé mai TL di’ak, agora kona-ba broken 15% ne’e interpretasaun terminolojia espesifikasaun tékniku, maluk sira balu interpreta dehan fali foos aat, maibé lae foos di’ak, agora daudaun halo komparasaun ho foos iha ne’e moos hanesan.
Nia hatutan, iha interpretasaun sobre broken 15 % hakarak aprezenta katak terminolojia broken iha ne'e terminolojia espesifikasaun tékniku relasaun ho prosesu iha prosesu dulas hare bainhira sai ba foos.
Broken iha ne'e hatudu liu ba prosesu tomak husi prosesu dulas hare kulit nian ne’e mak rezulta foos isin balu tohar atu hatudu katak foos di'ak hela ba konsume la'ós aat hanesan maluk balu halo interpretasaun dehan katak aat, kuandu foos ne’e uut entaun aat duni maibé lae.
Prosesu hodi determina katak foos ne’e broken hira tenke mai husi teste naruk ida ne’ebé envolve kuaze rekizitu lubuk boot ida mak hanesan hare kulit ne'ebé agora daudaun atu dulas ne’e mai ho kadar bee hira, hare kulit nia produsaun horibainhira, mákina ne'ebé atu utiliza dulas hare kulit iha gret hira.
Iha kooperasaun G to G ne’e regra mak obriga hodi hakerek no hatete ho loloos kona-ba saida mak enxe iha saku laran, tanba ne’e mak hakarak hatete katak foos di'ak, la'ós foos gagal ka aat hanesan maluk balu hatete.
Aleinde ne’e hakarak aprezenta katak ró ne’ebé tama ba data dahuluk sei nafatin atraka hela iha portu no seidauk bele halo deskaregamentu tanba sei iha hela prosesu administrasaun entre fornesedor ho banku sobre dokumentu orijinál ne’ebé fornesedor tenke aprezenta maibé tanba impaktu Covid-19 mak atraza dokumentu sira ne’e atu to’o iha Timor-Leste ho nune’e mak rezulta tarde husi prosesu pagamentu tuir akordu ne’ebé parte rua asina ona.
Iha loron 17-Agostu 2020 arte rua foin iha konkordánsia hodi bele realiza pagamentu, hafoin partisipasaun membru Governu hodi loke segel ne’ebé justifika katak mezmu dokumentu orijinál sira seidauk to’o, maibé sasán materiál fíziku iha ona portu Dili TL, maibé kona-ba kestaun ne’e rezolvidu ona.
