“KDL iha ona dadus 200 resin labarik ne’ebé mak agora daudaun faan hela sasan iha Dili laran,” dehan nia iha HNGV, Segunda (01/06).

Hafoin iha dadus ne’ebé kompletu, Komisaria ne’e hatete, KDL sei hato’o ninia rekomendasaun ba ministériu relevante sira hodi atende.

“KDL laiha papel atu fó apoiu direita ba problema labarik sira nian. KDL bele halo advokasia oinsa governu bele tau programa prioridade governu nian hodi responde ba nesesidade labarik sira nian,” dehan Dinorah.

Relasiona ho loron mundial labarik nian ne’ebé monu iha 1 Juñu, Dinorah hato’o parabéns ba labarik sira hotu iha mundu tomak, liu-liu ba labarik sira iha Timor-Leste.

Ba tinan ne’e, Dinorah dehan, tanba surtu Covid-19, KDL la komemora, maibé vizita de’it labarik sira ne’ebé mak baixa iha Hospital Nasional Guido Valadares.

Vizita ne’e, nia dehan, atu fó korajen ba sira no enkoraja sira nia inan-aman hodi bele rekupera lalais husi sira-nia moras.

Iha fatin ketak, Diretór Forum Organizasaun Naun-Governanmental Timor-Leste (FONGTIL) hatete, iha labarik barak iha TL mak halo serbisu hodi ajuda sira-nia inan aman.

Tuir nia, fatór ne’ebé halo labarik sira tenke serbisu mak ekonomia familia ne’ebé la sufisiente atu atende nesesidade uma laran nian.

Nia hatutan, tanba kondisaun ekonomia no tanba mós koñesimentu inan-aman kona-ba direitu labarik ne’ebé sei minimu, nune’e labarik barak mak kontinua halo servisu forsada ka serbisu ne’ebé la merese atu sira halo.

“Inan-aman sira mós apoiu katak labarik sira tenke halo serbisu hodi ajuda inan-aman, maibé loloos, tuir regra internasionál, konvensaun ba direitu labarik nian, bandu labarik sira serbisu forsa liu sira-nia kbi’it,” dehan nia.

PM Taur husu Estuda Nafatin

Entretantu, relasiona ho loron mundial ba labarik sira, Primeiru Ministru Taur Matan Ruak husu ba labarik sira atu kontinua estuda.

Xefe Governu ne’e hatete, kada tinan TL sempre festeza loron ne’e ho animasaun oioin hodi motiva labarik sira atu dezenvolve sira-nia talentu ba futuru, maibé ba tinan ida ne’e laiha selebrasaun tanba surtu Covid-19.

PM Taur dehan, governu liu husi Komisaun Direitu ba Labarik sei kontinua buka oinsa atu tau-matan ba labarik sira-nia direitu fundamental ne’ebé hatuur ona iha polítika Governu nian.

“Tanba ne’e iha loron espesiál ida ne’e hakarak apela ba labarik sira hotu, atu aproveita imi-nia tempu osan mean ne’e ho didi’ak ho estuda no estuda, tanba imi mak futuru nabilan ba Timor-Leste,” PM Taur husu.

Deputadu PD husu ME Kria Kondisaun Di’ak

Deputadu husi bankada Partidu Demokratiku (PD) iha Parlamentu Nasionál husu ba Ministeriu Edukasaun (ME) hodi kria politika di’ak ida atu fasilita labarik sira hodi  aprende di’ak, tanba sira mak futuru nasaun nian.

“Bankada Partidu Demokratiku hakarak halo apelu ba Ministeriu Edukasaun atu hanoin no dezenvolve nafatin politika ida ne’ebé benefisia labarik Timor-oan hotu iha sira-nia prosesu atu aprende, prosesu atu moris iha sira-nia familia, komunidade. Labarik sira mak futuru nasaun ida ne’e nian,” dehan Xefe Bankada PD, António da Conceição.