Bankada CNRT hakruuk ba desizaun Tribunál Rekursu, hodi deside partisipa plenária,  maske konsidera  nafatin aktu Bankada tolu FRETILIN, PLP no KHUNTO  ba sunbstitusaun meza Parlamentu Nasionál ne’e illegal.

Deputadu Bankada CNRT, Gabriel Soares hatete, povu Timor-Leste, na’in ba justisa, Bankada CNRT la-nonook no la husik liu de’it asaun asaltu poder ida-ne’e, tanba-ne’e maka Bankada CNRT kontesta asaun ilegal hirak husi Bankada tolu ne’e ba Tribunál kompetente.

Maibé infelizmente, Tribunál Rekursu sempre deside indeferimentu liminar ba asaun inkonstitusionalidade ne’ebé Bankada CNRT apresente, tanba laós aktu lejislativu no regulamentares maibé, aktu polítiku.

Inderferimentu liminar ne’e katak, Tribunál Rekusu rekuza atu halo apresiasaun ba substánsia de matéria husi rekursu ne’ebé CNRT hato’o ba Tribunál ne’e rasik.

“CNRT kontinua depozita konfiansa ba Tribunal hanesan órgaun as liu atu foti desizaun, maske Tribunal hatudu ona atu lakohi foti papél tuir nia kompeténsia atu hakotu disputa legal ba implementasaun Konstituisaun da Republika no lei oan sira. Tanba-ne’e CNRT tenke foti papél atu mai luta iha plenária ida-ne’e,”dehan nia, iha Parlamentu Nasionál, Tersa (02/06).

Nia dehan, partidu CNRT ho fuan boot simu no respeita nafatin desizaun Tribunál nian tuir Konstituisaun haruka katak, Tribunál nia desizaun mak ás liu iha País de Direitu Demokrátiku mésmuke desizaun Tribunal nian ne’e lamentável tebes, tanba Tribun’al tenta atu hases án hodi deside materia de faktu no apenas deside indeferimentu liminar.

Tanba tuir Bankada CNRT konsidera Deputadu sira husi Bankada FRETILIN, PLP, no KHUNTO publikamente hatudu komportamentu agresivu no organizadu realiza plenária hodi destitui Senhor Prezidente Parlamentu Nasional, Deputado Arão Noe de Jesus.

“Bankada CNRT fiar no iha konviksaun katak, asaun arbitraria ida-ne’e hatudu momoos ba povu Timor-Leste além lisaun ida lad’iak ba Povu Timor-Leste maibé mos revela istoria metan iha prosesu desenvolvimentu Estadu Direitu no CNRT konsidera asaun ida-ne’e nudar asaltu poder ba meza Parlamentu Nasionál,”dehan nia.

Tuir nia, asaun asalta poder ida ne’e hatudu violasaun klara no gravé ba normas konstitusionais, liu-liu artigu 99 (3) Konstituisaun RDTL katak, Parlamentu halo reuniuan ordinária ho konvokasaun husi Prezidente Parlamentu Nasionál.