Relasiona ho kontrusaun Aeroportu Internasional Nikolau Lobatu Komoro, ne’ebé sidadaun barak sai afeitadu ba rai refere.

komunidade husi Aldeia Beto-Tasi, Aldeia Naroma, Aldeia Anin-Fuik inklui Aldeia Aldeia Loron-Matan, Suku Madohi, Postu Administrativu Don Aleixo, kinta ne’e, realiza konferensia imprensa kona ba lamentasaun komunidade uma-kain 130 ne’ebé afeitadu ba konstrusaun Aeroportu Internasional Nikolau Lobato.

Entretantu, uma-kain 52 laiha disputa no uma-kain 57 tama iha lista disputa ho estadu tanba rai privadu.

Porta-Vóz Octaviano da Costa hatete, rai ne’ebé disputa ho estadu ho medida liu rihun 110 metru kuadradu inklui rai privadu.

Tanba ne’e, nia husu atu resolve antes halo konstrusaun Aeroportu.

“Bazeia ba publikasaun mapa, totál uma-kain 130 mak afetadu, uma-kain 57 mak tama iha lista Disputa ka problema ho Estadu no uma-kain 52 laiha razaun fundamental no 5 deit mak iha, sira ne’e pertense ba Aldeia Beto-Tasi no Anin Fuik. Husi rai ne'ebé disputa ho nia medida totál mais ou menus 110742 M2. (11 hektares resin),”dehan nia sede Beto-Tasi, kinta ne’e (24/06).

Nia hatutan, bazeia ba deskrisaun ne'e, komunidade afetada husi Aldeia 4 hanesan, Beto-Tasi, Anin Fuik, Naroman no Loro-Matan, lamenta tebes tanba mapa publikasaun refere kria problema entre komunidade rasik inklui autoridade lokál.

Tanba iha iregularidade barak iha prosesu atendementu administrativu inklui mós laiha kordenasaun no la konsulta antes entre Komisaun Konjunta Interministeriál ba projetu refere ho komunidade molok publika, piór liu rai privadu barak mak tama hotu ba disputa ho estadu.

“Ami husu ba Komisaun Konjunta ba projetu, liu-liu Diretor Diresaun Nasional Servisu Cadastrais, Sr. Paulino da Cruz ne'ebé asina iha lista mapa publikasaun hodi tun mai esplika ba ami,”tenik nia.

Entretantu, Xefe Suku Madohi, Bernadinho de Cristo hatete, bainhira Governu foti dadus laiha reklamasaun husi komunidade, maibé agora diferente fali.

“Laiha entre ita, dehan Governu la fó hanoin ba ita bo’ot sira no laiha razaun dehan Governu halo buat ida ita komunidade no autoridade la hatene, hanesan ita bo’ot sira kestiona, maibé antes ne’e ha’u rasik mai konsolida no fó ona hanoin atu halo preparasaun bainhira hato’o imi nia razaun,”dehan Xefe Suku.

Sidadaun Area Marinir mós kestiona kona ba mapa publikasaun uma-kain afeitadu sira tanba laiha kordenasaun no kunsultasaun ba sira.

Asistente Editor: Saturnina da Costa