Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr.Rui Maria de Araújo hatete, matebian mai husi Suku Ritabou, Postu Administrativu Maliana, Munisipiu Bobonaro.
Matebian iha moras antes hanesan, tuberkuloze pulmonar ho asma no mear, isin manas ho iis-boot iha uma durante loron tolu molok ba konsulta iha Ospitál Referénsia Maliana.
Hafoin iha loron 15 fulan-Juñu, ekipa saúde enkamiña husi Ospitál Referénsia Maliana, mai iha Izolamentu Vera Crus hodi halo tratamentu ba moras hanesan dignoze traballu sindroma insufisiénsia respiratória aguda (SIRA), ka susar ou difisil atu dada-iis, tanba rezultadu hatudu matebian hetan mós moras Covid-19 (rezultadu PCR pozitivu ho CT–cycle treshold–geneE 13,3, gene N2 15,3).
Iha fatin isolamentu Vera Cruz ekipa médika halo re-avaliasaun ba dignóstiku, no to’o iha konkluzaun katak matebian iha Pneumonia tanba SARS-CoV-2 (Covid-19).
Matebian hetan tratamentu tuir protokolu ne’ebé iha, inklui tratamentu ho oksijéniu, liuhusi ventilasaun mekanika maibé horikalan (23/06) tuku 11:20, matebian iis-kotu, tanba septic shock, respiratoric failure no multiple organ failure. Enkuantu, familia husi matebian kordena ona ho ekipa saúde atu hala’o funeral tuir protokolu ne’ebé adopta iha Timor-Leste, aban (25/06) iha Maliana.
Entretantu, tuir dadus ema ne’ebé mate ho Covid-19 hamutuk na’in 20 kompostu husi mane na’in 14 no feto na’in 6.
Asistente Editor: Saturnina da Costa
