Tuir komunikadu imprensa Konsellu Imprensa ne’ebé online Independente asesu iha loron kinta ohin, katak KI konsidera publikasaun balun hamosu distrubu opiniaun publiku ne’ebé kontra produtivu, espesial ba kobertura no publikasaun notisia kona-ba kazu Abuzu Sexual, Pandemia Covid-19 no levantamentu Orsamentu Jerál Estadu (OJE) 2021 husi Fundu Petroliferu iha Banku Federal Amerika.

Meiu Komunikasaun Sosiál balun nia publikasaun notisia, bazeia deit ba “asumsi” jornalista nian no single source (fonte úniku). Impaktu husi publikasaun la imparisal ne’e, hamosu públiku nia preukupasaun no lamentasun.

Publikasaun notisia ba tranzmisaun lokál Covid–19 iha kapitál Dili no Covalima, hatudu momoos suspeitu sira liuhusi imajen no video.

Hanesan tuir rezultadu monitorizaun no análize Conselho de Imprensa ba publikasaun prosesu julgamentu kazu Topu Honis, iha Tribunal Oe-Cusse, Rejiaun Administrativu Espesiál Oe-cusse Ambeno –RAEOA – la halo cover bothside, entre suspeitu no vitima. No liuliu la halo reportajen sensivél jéneru, ne’ebé hakerek iha Kódigu Étika Pontu 5 no 10, ne’ebé proibidu atu  publika vitima menoridade sira - nia identidade no oinsá prosesu violasaun sexual.

Iha polítika redasaun, iha indikasaun afavor ba vitimia sira nu’udar parte husi papél mídia nian “voice of the voiceless” ka lian ba sira ne’ebé lian-la’ek.

Maski nunee, KI la sita mídia hirak ne’ebé la hatudu dixiplina tuir padraun jornalizmu nian.

KI afirma de’it katak iha faktu no razaun hatudu, tanba ne’e Konsellu Imprensa husu ba meiu komunikasaun sosiál no jornalista hotuhotu atu, kumpri Kódegu Étika Jornalistika, hodi evita risku legál no ameasa iha futuru hodi garante liberdade imprensa no liberdade espresaun iha país demokrátiku Timor-Leste, evita publika notisia bazeia de’it ba jornalista nia asumsaun no opiniaun, ne’ebé la bazeia faktu no realidade loloos iha tereñu liuhusi uza liafuan “deskonfia”. Liafuan deskonfia bele uza iha notisia bazeia ba sitasaun ka kutipan fonte nian, la’ós bezeia ba jornalista nia asumsaun no imajinasaun, nomos utiliza teknika kobertura in-depth no investigative reporting, ba asuntu sira ne’ebé kontroversál no sai ona polemika iha públiku no tenke balánsu ka cover both sides atu diskobre verasidade ka lia-loos husi asuntu refere.

KI sujere mós, atu nafatin sai lian ba sira ne’ebé lian-laek (vioce of the voiceless), maibé tenke kontinua kumpri ka tane-aas reportajen sensível jéneru no sensível ba sentimentu umanu vitima sira nian, nune’e sira labele sai vitima ba-daruak iha sosiadade nia leet, nafatin kumpri no halo reportajen tuir matadalan kobertura mídia ba COVID – 19 ne’ebé hasai iha tinan kotuk (2020) husi Conselho de Imprensa no UNDP koopera ho Asosiasaun Jornalista Timor Lorosa’e (AJTL) no Timor-Leste Press Union (TLPU). 

Jornalista: Saturnina da Costa

Editor: Jose Sarito Amaral