Kazu nain 19 ohin, iha mane nain 6, feto nain 13. Ema ho idade tinan 13: 1, ema ho idade entre tinan 16-79 hamutuk 18; ema sintomátiku na’in 3, ema asintomátiku na’in 16.
Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr Rui Maria de Araújo, informa katak, evulusaun surtu Covid-19 iha munisipiu Dili Ohin iha Munisipiu Dili iha kazu foun 19, no rekuperadu na’in 3.
Dr. Rui esplika katak, kazu pozitivu 3, kontaktu-besik ho kazu konfirmadu iha BTN III, Aldeia Terra Santa, Suku Madohi, Postu Administrativu Dom Aleixo.
Kazu pozitivu 1, kontaktu-besik ho kazu iha cluster Aldeia Maucocomate, Suco Becora, Posto Administrativo Cristo Rei.
Kazu pozitivu 2, kontaktu-besik ho kazu konfirmadu ida iha cluster HNGV, hela iha Aldeia Berbidu, Suku Becora, Posto Administrativu Cristo Rei. Kazu pozitivu 1, hela iha Aldeia Bidau Tokobaru 2, Suku Kulu-hun, Postu Administrativu Cristo Rei. Pozitivu ida ne’e kontaktu-besik ho kazu iha cluster Aldeia Lirio, Suco Motael, Posto Administrativo Vera Cruz.
Entretantu ba kazu pozitivu 10, hela iha Aldeia 20 de Setembro, Suku Bebonuk, Postu Administrativu Dom Aleixo. Pozitivu hirak ne’e kontaktu-besik ho kazu iha cluster hanesan. Kazu pozitivu 1, hela iha Aldeia Grilos, Suku Gricenfor, Postu Administrativu Nain Feto. Pozitivu ida ne’e kontaktu-besik ho kazu husi cluster balun iha Comoro.
Ba kazu pozitivu na’in 1, hela iha Aldeia Gideon, Suku Vila-Verde, Postu Administrativu Vera-Cruz. Pozitivu ida ne’e kontaktu-besik ho kazu husi cluster HNGV.
Ho nune’e, kazu detetadu ka pozitivu iha Munisipiu Dili husi dia 7 de Marsu 2021, to’o ohin, 20 de Marsu de 2021, hamutuk hotu 136.
Ho baze ba informasaun ne’ebé ekipa konjunta saúde nian rekolle, foku/cluster kazu pozitivu iha Dili, hetan revizaun hanesan tuir mai:
Husi cluster 34 ne’ebé iha, liu 50% maka la ativu ka, sira nia kazu la aumenta iha semana ida ikus, hanesan pur ezemplu cluster MTC, SEFOPE, Ministeriu Finansas ho tan sira seluk.
Dadus ne’ebé iha, pur enkuantu hatudu katak kazu hirak ne’ebé detetatu iha Baucau (nain 8) no iha Viquque (nain 3), nu’udar kazu ne’ebé lori sai husi Dili, entre 5 ho 9 de Marsu de 2021. Atividade prevensaun no mitigasaun Covid-19 iha Munisipiu sira seluk la’o hanesan baibain.
