Iha 23 Agostu, loron ida hafoin asidente ne’ebé hamate Padre Abito, PSIK simu keixa husi familia matebian no parte Dioseze Dili.

Hafoin simu keixa ne’e, PSIK hahú prosesa hodi rekoila informasaun balun husi feto ho inisial MSR ne’ebé Padre Abito tula atu ba haan iha Dare no foti mós dadus ne’ebé polisia tranzitu munisipiu Dili rekoila ona.

Portavoz PSIK, Octavio da Costa Araujo informa, parte familia no Dioseze Dili hato’o ona keixa ba PSIK relasiona ho Padre Abito nia mate.

“Kazu ne’e parte familia matebian no Dioseze Dili rasik mai ona hato’o keixa iha ami -nia fatin atu halo invetigasaun klean hodi hatene loloos motivu husi Padre nia mate,” dehan  Octavio ba Jornal INDEPENDENTE via WhatsApp, Domingu (28/08).

Nia hatutan, PSIK rekoila ona dadus inisiu husi feto ho insial MSR ne’ebé matebian tula, inklui mensajen sira husi matebian ba feto.

“Kazu ne’e dadus ita rekolla ona no alin feto ho inisial MSR ne’e hato’o ona deklarasaun ba ita, agora hein rezultadu autopsia mai, ita konklui ona invetigasaun, haruka ba iha ministeriu publiku atu aprezenta ba iha tribunal mak foti desizaun,” dehan nia.

Kona-ba deskonfiansa katak Padre Abito mate laos tanba asidente trafegu, Octavio dehan, ida ne’e segredu justisa no sei anunsia iha tribunal.

“Prosesu viajen Padre nian atu ba Dare ho feto ne’e, fila mai ida dalan hetan asidente oinsa ne’e rai ba segredu justisa, maibé ita hahú ona prosesu invetigasaun hodi rekoila dadus inisiu hodi hein rezultadu autopsia ne’e mai ita tau hamutuk haruka ba Ministeiriu Publiku ho tribunal mak bele anunsia sai rezultadu,” dehan nia.

Posibilidade, Ohin Finaliza Rezultadu Autopsia

Departamentu Forensik, Hospital Nasionál Guido Valadares, seidauk finaliza autopsia ba mate-isin Padre Abito.

Xefe Departamentu Forensik, HNGV, Nilton Tilman informa, prosesu autopsia ba mate-isin halo loron ida de’it, maibé atu formula ninia rezultadu presiza tempu.

“Autopsia ne’e loron ida hotu tiha ona, hakerek autopsia ne’e sei forma formula autopsia ne’e mak sei kleur, ne’ebé sei haan loron lima hanesan ne’e,” informa Nilton vi telefone, Domingu (28/08).

Nia hatutan, autopsia ne’e importante tebes ba kazu sira hanesan ne’e, maibé autopsia laos uniku dalan ne’ebé mak atu hatudu kauza mate.

“Autopsia ne’e importante tebtebes ba kazu sira hanesan ne’e, maibé autopsia ne’e laos uniku dalan ne’ebé mak atu hatudu kauza da morte ou penilaian kematian, ne’e lae,” nia afirma.

Molok ne’e Bazeia ba informasaun inisiu husi PNTL, liu husi Xefe Seksaun Polisia Tranzitu Munisipiu Dili, Inspetor Domingos Sarmento Gama, Padre Abito mate tanba uniku asidente (kecelakaan tunggal) iha ninia viajen husi Dare ba Dili.

Informasaun husi polisia ne’e ho baze deklarasaun husi sasin no rezultadu sena fatin akontesimentu (hasil olah tempat kejadian) ne’ebé halo hafoin asidente refere akontese iha 22 Agostu, tuku 8.30 kalan.

Tuir parte polisia, uniku asidente ne’e envolve ema na’in rua; Padre Abito ho feto ida ho inisial MSR.

Tuir informasaun husi MSR ba polisia katak, iha 22 Agostu, Padre Abito ne’ebé hela iha Seminário Maior Interdiosezanu São Pedro no São Paulo, Fatumeta, Dili, haruka mensajen ida ba nia hodi husu atu sira ba haan hahaan ruma iha area Dare.

MSR ne’ebé hela iha area Ailok-Laran aseita no ikus mai Padre Abito tula MSR ho motor marka Jupiter MX kór azul ho xapa matrikula E.8081 TL.

Maibé bainhira to’o iha dalan klaran, tanba rai nakukun ona, sira deside fila fali mai Dili.

Padre Abito ne’ebé kondus motor halai husi diresaun seminariu Dare nian ba diresaun dalan foun rezidensia Mauhoka nian.

Bainhira halai tuun ba rai loloon iha Dare nia okos, tuir relatoriu asidente trafiku PNTL katak, Padre Abito la konsege kontrola motor ho nune’e motor halai sees husi dalan no monu tuun ba valeta kuak.

“Tuir informasaun ita-nia sidadaun feto ne’e deklara katak Amu mak SMS hodi konvida malu atu sira na’in rua ba haan hahaan ruma iha Dare, maibé sira na’in rua lao to’o iha dalan klaran haree ba kondisaun rai ne’e kalan ona, sira fila fali mai to’o iha dalan foun husi Dare nian tuun mai liu husi dalan señor Mahoka nia uma leten ne’e, entaun halai sees soke moru ida ne’ebé halo hanesan penahan ne’e, sira monu liu ba valeta kuak,” informa Inspetor Domingos, loron ida hafoin akontesimentu.

Hafoin akontesimentu ne’e, PNTL Dili simu informasaun no haruka kedan ekipa ba fatin akontesimentu.

Iha momentu ne’ebá, tuir relatoriu asidente husi PNTL, Padre Abito ne’ebé sofre kanek todan seidauk mate no karreta privadu ida mak ajuda hodi tula Padre Abito ho MSR ba Hospital Nasionál Guido Valadares hodi halo tratamentu.

“Karreta privadu ida mak ajuda lori ba HNGV hodi halo tratamentu, maibé motorista (Padre Abito) labele salva no mate iha HNGV,” relatoriu asidente ne’e hakerek.

Tuir relatoriu ne’e, Padre Abito sofre kanek todan iha nia ulun no MSR sofre kanek kaman iha nia ibun no ain-tuur kuanan. MSR mós sente moras iha nia hirus-matan no kotuk-laran.