Xanana Gusmão orgullu ho mensajem Papa ba povu Timor-Leste, prosesu dezenvolvimentu nasionál no toleránsia iha sosiedade durante ukun aan, iha tinan 20 nia laran.
“Ha’u agradese bele hasoru sua-sentidade Papa Francisco, nia agradese tebes hodi ha’u fó apresu boot tebes ba Timor-Leste, Prezidente no povu tomak, nune’e hodi Prezidente Repúblika nia naran, ha’u fó hatene katak, ita tuir hela atividade sua-sentidade ninian, liu-liu kona-ba atu rezolve funu no buka meius hapara tiha funu iha Ukrania ho rai seluk agora dadaun ne’e,” dehan Xanana hafoin hasoru Papa, iha Palasiu Apostoliku Santa Sé Roma (25/08).
Líder nasionál introduz ba Papa katak, Povu Timor-Leste akompaña atividade líder igreja ne’e, liu-liu vizita ba Irake, hodi halo aprosimasaun ho relijiaun Islámika no esforsu ne’e nu’udar aktu exemplar.
Tuir Xanana, Papa hateten, Timor-Leste merese hetan Kardeál foun hanesan Arsebispu Arkedioseze Metropolitana Dili, Dom Virgílio do Carmo da Silva no hanesan Kardeál nasaun seluk ne’ebé hetan investidura iha loron 27 Agostu 2022.
Líder Nasionál ne’e mós hateten, Prezidente Ramos-Horta agradese Papa Fransisco ne’ebé temi no promove naran Timor-Leste ba mundu tomak, tamba implementa projetu rezolusaun númeru 93/V(4ª) kona-ba fraternidade umana no Koexisténsia Komum ho Umanidade no kona-ba asuntu ida ne’e, líder religiaun sira iha Timor-Leste hahú koordena malu, hodi realiza programa oin-oin ne’ebé envolve joventude.
“Iha ami nia konversa, ha’u temi mós kona-ba fraternidade umana hodi dehan katak, iha Timor-Leste ita hahú tiha ona programa hirak ne’e, iha fulan sira ne’e no sei hatudu tan iha fulan setembru 2022, no sei buka halo tinan-tinan hodi nune’e, loron ruma prepara aan di’ak liu tan, grupu sira hodi religaun oin-oin, Katoliku, Kristaun, Musulmanu, Hindu no Konfusiu hodi bele ba apresenta iha Jakarta, nune’e motiva religaun sira seluk bele iha hanoin hadomi malu, respeita malu no kria dame,” fundamenta líder ne’e.
Entretantu, Timor-Leste nu’udar pais ki’ik ida ne’ebé maioria Katolika, sai exemplu hodi promove nafatin toleransia entre relijiaun no liberdade relijiaun iha nasaun sira, iha Regiaun ASEAN no kaer metin prinisipiu hametin dame, hodi tane aas konseitu no prinisipiu Fraternidade Umana ne’ebé Papa Francisco promove ba mundu tomak.
Iha enkontru ne’e, Papa Francisco defende atu kontinua programa fraternidade umana iha pais hotu, atu hapara ona funu no apresia esforsu Timor-Leste hodi ajuda Papa nia programa.
“Amu Papa iha vontade liu, ita sente tebes nia kontente simu delegasaun ofisiál husi Timor-Leste ne’ebé reprezenta Prezidente. Tanba ne’e, ha’u kontente no ha’u dehan ba nia, povu tomak sei reza ba ita boot nia saúde, tanba saída maka Papa halo, hodi ko’alia hasoru funu, ko’alia kona-ba pas, rekonsiliasaun no ko’alia dame entre religaun, buat hirak ne’e presiza korajen boot hanesan Papa Francisco iha vizaun boot tebes no hanoin luan haree ba mundu ohin loron,” dehan Xanana.
Enkuantu, hasoru malu entre Xanana no Papa Francisco termina ho serimónia bensaun murak hosi Papa ba ekipa tomak inklui entrega prendas kaibauk no kafé Timor-Leste no Papa Francisco mós entrega prendas tersu no estatua, medalla agradesimentu no livru balun ne’ebé hetan bensaun entrega ba ekipa nu’udar sinal agradesimentu.
Hafoin enkontru ho Papa remata, Xanana oferese mós prendas Timor-Leste hanesan Tais, Kaibauk, Morten no kafe Timor-Leste ba Sekretariu Estadu Vaticano, Kardinal Pietro Parolin, Msgr. Edgar Parra, Suplente Ba Asuntu Jerál ba Sekretariu Estadu Vaticano, Sekretariu Relasaun ba Estadu Vaticanu, Arsebispu Paul Gallagher, Sekretary of Relation With States, Joseph Murphy, Head of Protocol of the Vatican no Msgr. Bruno Bastos Lins, Deputy of Head of Protocol.
