Inocencio de Jesus Xavier hatete kazu osan rihun $130 ho kazu droga ema na'in sia ne'e nia prosesu to'o iha ne'ebé, tanba antes ne'e kazu sira ne'e viral maibé ikus mai laiha kontinuasaun.
"Ami hakarak husu, kazu osan rihun $130 ninia prosesu to'o iha ne'ebé, kazu ne'e viral tiha mais ikus mai mosu buat sira seluk hanesan pengalian issue, maibé ami husu nafatin investigasaun tenke kontinua," dehan Peskizadór AJAR, Inocençio de Jesus Xavier ba jornalista INDEPENDENTE iha nia kna'ar fatin, Faról, (10/1).
Nia dehan, Partidu KHUNTO mós presija hetan esklaresimentu, sira bele foti fali sira nia osan ka lae, se la foti osan karik tanba saida, ida ne'e tenke hatete ba ema na'in no Tribunál mak tenke halo servisu ho lalais.
Nune'e mós ba kazu droga to'o ohin loron públiku la hatene nia prosesu, tan ne’e AJAR husu ba Ministériu Públiku, PSIK atu lori kazu ne'e la'o to'o ninia rohan, labele hanesan manas-manas ikus mai laiha rejultadu, depois arguidu sira semo tun sa'e hela.
Nia esplika, aprejentasaun periódika ho Termu Identidade Rezidénsia (TIR) to'o ona iha ne'ebé, ninia prosesu sira ne'e la'o hanusa ona, labele halo sensasi de'it depois ikus mai laiha rezultadu.
Antes ne’e, Ministériu Públiku (MP) rejistu ona kazu hasoru Konseleiru Másimu Partidu KHUNTO, José Naimori Bucar hamutuk ho Vise Ministru Interior, Antonio Armindo, Vise Ministru Justisa, José Edmundo Caetano no Prezidente Konsellu Administrasaun Aeroportu no Navegasaun Aerea Timor Leste, José Trindade da Cruz Pinto.
Aliende ne'e, Tribunál Distritál Díli (TDD), liu husi Primeiru Interrogatóriu ne’ebé prezide husi Juis singular, Argentino Nunes deside aplika medida koasaun Termu Identidade Rezidénsia (TIR) no Aprezentasaun Periódika ba arguidu na’in rua ho inisiál LC ho JC ne’ebé deskonfia involve iha kazu ilísitu bá droga no iha ligasaun ho arguidu na’in sia.
