Iha Sabadu (04/07), Prezidente partidu CNRT Kay Rala Xanana Gusmão iha Nicolau Lobato nia oan-mane, José Lobato, no komunidade Soibada nia oin, promete sei buka tuir loloos ruin Saudozu Nicolau Lobato.

Xanana dehan, kona-ba saudozu Nicolau Lobato nia ruin, Indonezia sira mak sei iha problema atu deside lia loos.

“Agora ha’u para tiha situasaun ne’e, see mak uluk ha’u haruka buka saudozu Nicolau Lobato nia mate-ruin mak Saudozu Cirilio (eis Ministru Defeza). Ofisiais ne’ebé komete iha kazu (oho Nicolau) hodi buka atu diskuti asuntu ne’e, mais buat ida ne’e ami hetan fali buat ida bosok fali ami ne’e. Tanba ne’e mak ami la hetan informasaun loloos. Mais ha’u promete sei kolia ho Diretór Nasionál Informasaun hodi koalia fali ho Indonezia, ita buka tuir loloos,” dehan Xanana.

Iha fatin hanesan, Saudozu Nicolao Lobato nia oan mane, José Lobato hatete,  atu valoriza Saudozu Nicolau Lobato nia sakrifisiu, importante liu mak iha rai ne’e hakmatek nafatin hodi bele lao ba oin.

Entretantu, Saudozu Nicolau Lobato nia tiun, José Andradade hatete, familia kontetente ho prezensa Xanana nian iha saudozu nia moris fatin.

Maibé, nia dehan, familia sente triste uitoan tanba to’o ohin seidauk hetan Saudozu Nicolau Lobato nia ruin.

Maske nune’e, sira fiar katak, Xanana ne’ebé iha influensia maka’as bele kopera ho governu hodi buka tuir Saudozu nia ruin.

“Ita-boot mak lian maka’as iha Timor ne’e, ema hotu tauk, ema hotu hakruuk ba ita-boot Kay Rala Xanana Gusmão. Tanba ne’e, familia hakarak husu maun-boot serbisu hamutuk ho governu atu fó hatene saudozu nia ruin ne’e iha tasi laran, rai maran ka iha Indonezia,” dehan nia.