Diretora Servisu Saúde Munisipiu Manufahi, Florencia C. R. Tilman informa, hahú husi tinan 2020, postu saúde haat ne’ebé lokaliza iha suku Foho Lau no suku Aitemu iha postu administrativu Turiskai, suku Weberek iha Postu Administrativu Alas, no suku Tutuhuru iha Postu Administrativu Same.
“Ami menus tebes profisionais saúde hodi halo atendimentu iha munisipiu Manufahi, tanba daudauk ne’e ami iha postu saúde hamutuk 23 maibé iha 4 mak pessoal saúde laiha,” dehan nia hafoin partisipa workshop kona-ba Avaliasaun Risku Korupsaun iha Aprozionamentu Setor Saúde, iha Hotel Timor, Kuarta (08/06).
Nia hatutan, hahú iha tinan 2020 postu saúde haat ne’e husik mamuk tanba profisional saúde barak prefere liu servisu iha Dili.
“Sira hakarak servisu iha Dili bainhria desizaun husi nivel altu tuun Servisu Saúde Munisipiu labele halo buat ida,” dehan nia.
Ho problema ne’e, nia dehan, nia parte halo ona enkontru ho Ministériu Saúde atu bele kontratu internatu hodi suporta postu saúde ne’ebé pessoal saúde laiha.
Molok MS halo asaun balun, nia dehan, nia parte durante ne’e halo mobile klinik dala rua ka tolu kada fulan, inklui halo internatu saúde ba familia.
“Ami sempre vizita tama-sai uma,” dehan nia.
Tuir dadus, total profisional saúde iha Munispiu Manufahi hamutuk na’in 30 ne’ebé fahe ba Sentru Saúde 4 no Postu Saúde 23.
“Husi pessoal hirak ne’e SSMM fahe seidauk to’o hodi kobre hotu atendimentu saúde iha Sentru Saúde no postu saúde sira,” katak nia.
Entretantu, jornalista jornal INDEPENDENTE tenta halo konfimasaun asuntu ne’e ho Diretór Rekursu Humanu MS, maibé Diretór ne’e la disponivel atu fó komentariu.
