Diretór Administrasaun Finansas no Lojistika Horex Baukau, Simão Soares hateten, kada loron sempre halo transferénsia pasiente mai nasionál tanba mákina X-Ray avaria maibé seidauk identifika atu hadi’a tanba mákina ne’e rasik modelu internasional.

“Ho ida ne’e transferénsia pasiente mai HNGV ne’e barak liu. Ami labele halo atendimentu tanba tenke bazeia ba identifikasaun husi X-Ray ne’e prinsipalmente. Maibé nia avaria entaun ami tenke transfere mai HNGV,” nia hateten hafoin partisipa Workshop kona-ba Avaliasaun Risku Korupsaun iha Aprozionamentu Setor Saúde, iha Otél Timor, Segunda (07/06).

Transferénsia pasiente ne’ebé Hosptiál Horex Baukau halo kada loron iha pasiente na’in lima mai kraik, ne’ebé maioria mai ho moras stroke, hipertensaun no kardiovaskular ne’ebé pasiente mai ho idade avansada.

Iha fatin hanesan, Diretor Ezekutivu Hospitál Referal Suai, José Moniz Fereira hateten, durante fulan lima nia laran ne’e halo transferénsia pasiente mai iha HNGV hamutuk hotu 43 ne’ebé liu husi Aviaun no ambulánsia, sira ne’e maioria mai ho kazu pediatria no moris preterminu, inklui tumor sira.

“Sira ne’e tanba infeksaun iha inan nia kabun, no seidauk too nia fulan bebe moris ona, entaun kazu sira hanesan ne’e mak ita haruka mai liu HNGV,” nia hato’o.