Vise Prezidente Prezidente Parlamentu Nasionál husi bankada Khunto, Luis Roberto da Silva lamenta ho komprimisu polítiku ne’ebé hatete katak bainhira eleitu sei halo negosiasaun ho nasaun sira seluk atu joven sira ba servisu iha rai li'ur, maibé nunka hanoin oinsá kria kampu servisu iha rai-laran ba sira.
"Ida ne'e hatudu katak ita hamamuk joven sira iha rai laran, maske ninia benefisiu iha ba rai laran, ba joven sira ne'ebé mak ba servisu iha rai li'ur, maibé ninia impaktu negativu mak ne'e iha Timor ne'e lideransa sira no governu la konsege kria kampu servisu ba joven sira, maibé hanoin hotu-hotu ba iha rai li'ur” dehan nia iha PN, kuarta horseik (08/06).
Tan ne’e, nia husu atu estadu, liu-liu governu kria kampu servisu iha rai laran.
"Ita-nia joven sira hanesan hotu-hotu ba rai li'ur de'it tanba beibeik hanesan ne'e joven sira iha rai laran sei mamuk tanba sira ba hotu rai li'ur de'it," nia dehan.
Iha fatin hanesan, Deputadu Bankada Fretilin, Fabião de Oliveira hatene, joven sira laos hotu-hotu ba servisu iha rai li'ur tanba iha mós servisu iha Timor-Leste.
“Ema komesa servisu hela, hanoin oitavo Governu neneik kria ona kampu servisu ba joven sira, maibé dala-ruma joven sira sente katak saláriu boot liu mak nasaun Austrália, Korea, Irlandia no Inglatera.”
Maske nune’e, nia dehan, governu presiza buka meius hodi bele rezolve joven sira atu servisu iha rai laran ho orsamentu jerál estadu 2022 no Orsamentu Retifikativu.
