Nia hatutan, razaun labarik sira ne’e, la asesu ba edukasaun pre-eskolar tanba, fizikamente kondisaun eskola do’ok, ho nune’e, inan-aman mós laiha vontade atu lori oan sira ba eskola.

Aleinde ne’e, nia dehan, iha suku balun, iha teritoriu laran mós seidauk iha eskola pre-eskolar. Ida ne’e sai prekupasaun bo’ot ba labarik sira.

“Iha suku barak iha teritoriu laran, balun seidauk iha eskola pre-eskolar, entaun inan-aman sira, tenke lori fali sira nia oan ba iha suku seluk, ida ne'e mos prejudika sira, tanba iha eskola balun ho distansia ne'ebé mak do’ok", dehan nia ba jornalista sira salaun City8, Manleuana, sesta ne’e (10/06).

Tanba ne'e mak, iha dadus hatudu katak, labarik timor-oan ho pursentu 75 la asesu ba iha ensino pre-eskolar.

Tuir Prezidente, iha familia no inan-aman barak mak seidauk tau importansia ba eskola infasía, tanba sira hanoin katak labarik ho idade 3 to’o 5 ne’e, husik halimar lai iha uma, hafoin halo ona tinan 6 mak bele ba eskola.

Entretantu, Prezidente ne’e esplika, aleinde, dadus kona ba labarik sira ne’ebé la asesu ba pre-eskolar, iha mós dadus ne’ebé hatudu, labarik feto sira ne’ebé hetan violensia fiziku husi manorin sira iha eskola hamutuk 65% no labarik mane iha 75%.

"Iha ami INDDICA nia servisu, ami hetan keixa lubuk ida, liga ho violensia hasoru labarik sira iha eskola, tanba ne'e, keixa sira ne'e, ami halo kedan relatoriu pareser ba iha Ministeriu Edukasaun atu bele halo invetigasaun ba kazu refere," tenik Dinorah.

Nia dehan, iha eskola lubuk ida liu-liu iha Dili laran, maioria implementa hela politika ho naran zero toleransia.

Enkuantu, iha tinan ne’e, parte INDDICA simu keixa 10 liga ho kazu violensia hasoru labarik,  husi manorin na’in sira, iha Dili no iha Munisipiu.

Ho violensia hasoru labarik sira ne'e, INDDICA  esforsu hela, atu nune'e nafatin fó hanoin ba MEJD atu iha regulamentu ka regras ruma ne'ebé forte, hodi bele fó sansaun ba manorin na’in sira ne’ebé uza forsa iha prosesu aprendizajen.