Diretór Ezekutivu Asosiasaun HAK, Manuel Monteiro hatete, Parlamentu Nasionál liu husi Konsellu Administrasaun foin lalais ne’e halo ona karta hodi hapara ona prosesu alienasaun ba karreta Prado nian.

Maski nune’e, eis-deputadu balun lori karreta ne’e ba uma to’o agora seidauk hatama. Ne’e duni, konsidera ne’e aktu krime korrupsaun no abuzu podér, tanba ne’e presiza halo karta ruma ba ministériu públiku atu buka tuir dalan legál.

Entretantu, Sekretáriu Jerál Parlamentu Nasionál, Adelino de Jesus hatete, asuntu ne’ebé relasiona ho karreta Prado ne’e asuntu polítiku, tanba ne’e nia labele foti desizaun maibé Prezidente PN maka iha kompeténsia.

Hataan ba kestaun ne’e, Prezidente PN, Aniceto Guterres hatete, problema karreta Prado la'ós mosu iha IV lejizlatura Konstitusionál, hahú kedas iha III Lejizlatura tanba ne’e lakohi atu foti risku.

“Karreta Prado ne’e la'ós ha’u nia problema, Konsellu Administrasaun deside halo leilaun derrepente iha ultima oras Prezidente Parlamentu Nasionál (III Lejizlatura) foti desizaun kansela depois husik hela problema ne’e mai IV Lejizlatura” nia esplika,

Relasiona ho situasaun ne’e lider órgaun soberania daruak ne’e foti ona desizaun sei husik nafatin problema ne’e ba V Lejizlatura atu bele rezolve.

Klaramente patrimóniu Estadu ne’e hakarak ka lakohi kuandu mandatu remata tenke entrega hikas, maibé sira ne’ebé seidauk entrega ne’e tanba desizaun husi Prezidente PN anteriór mak halo desizaun.