Prezidente Parlamentu Nasionál (PN), Aniceto Guterres hatete, preparasaun agora daudaun ne’e la’o hela, tanba ne’e sei halo konferénsia lider bankada nian hodi diskute asuntu tékniku nian.

“Data ne’ebé ha'u marka 13 Juñu ne’e fiksu ona, la presiza halo fali apresiasaun husi lider bankada sira tanba ha’u mak Prezidente PN, iha podér atu halo desizaun”, tenik nia, iha Uma Fukun PN, horisehik.

Tribunál Rekursu proklama ona rezultadu eleisaun iha 28 Maiu, hahú loron ne’e mai to’o 12 Juñu kompleta ona loron 15, entaun loron tuir mai tenke hahú mós primeira reuniaun dahuluk V Lejizlatura nian. Tanba ne’e, la presiza halo fali konfirmasaun ba prezidente bankada sira.

Iha fatin hanesan, tuir Sekretáriu Jerál Administrasaun Parlamentár, Adelino Afonso de Jesus hatete, determinasaun ba loron tomada pose ba deputadu foun ne’e kompeténsia absoluta Presidente PN nian, tanba ne’e enkontru lider bankada ne’e atu kolia kona-ba asuntu tékniku nian.

“Enkontru lider bankada ne’ebé atu halo desizaun ba tékniku nian hanesan Lay Out plenária nian”, dehan nia.

Lay Out parlamentár ne’e presiza duni atu diskute hodi rona kada lider bankada sira, atu bele deside iha sala plenária ne’e bankada ida ne’ebé atu tuur besik malu ne’e sira mak deside hamutuk.

Kuandu ne’e remata ona hanoin katak iha loron13 Juñu ne’e ba prosesu simu deputadu foun garantia katak sei la’o di'ak.