Kona-ba buka votus, Xefe Bankada CNRT iha Parlamentu Nasionál (PN), Duarte Nunes hatete, asaun karidade ne’ebé Prezidente partidu CNRT halo ba ferik-katuas no kbiit laek sira la’os atu buka votus.

“Votus ne’e sei kleur, iha 2023, to’o iha ne’eba ema haluha tiha ona asaun karidade ne’e. Tanba ne’e asaun karidade (Xanana) la’os kestaun buka votus,” dehan Duarte iha PN, Segunda (27/07).

Deputadu Duarte esplika, prezensa Xanana iha komunidade nia leet atu fó mensajen ba povu, no iha ema balun mak hakarak fó apoiu atu halo asaun karidade.

“Maun boot nia prezensa ne’e atu fó mensajen ba povu de’it, maibé asaun karidade ne’e ema seluk mak oferese par nia fó ferik no katuas sira ne’ebé kbiit laiha liu,” dehan nia.

Nia dehan, daudauk ne’e Xanana iha fronteira hodi fó mensajen no motiva populasaun sira iha ne’ebá atu evita Covid-19 labele tama TL.

“Maibé karik ema balun kestiona katak asaun karitativa ne’e la di’ak,  entaun ba husu sira ne’ebé kestiona hatudu sira nia di’ak ne’e iha ne’ebé? Labele kolia de’it dehan la di’ak,” dehan nia.

Iha fatin hanesan, Prezidente Bankada FRETILIN Francisco Miranda Branco hatete, deputadu sira kestiona tanba lia-fuan karidade ne’e.

“Tanba karidade ne’e, ita fó ismola, entaun ita lider ida, ita kaer ukun kleur ita la dezenvolve ita-nia povu, sei mukit hela mak ba fó ismola,” dehan nia.

Tuir nia, asaun Xanana nian la’os karidade, maibé solidaridade ba maluk sira ne’ebé mak iha momentu ida ne’ebé iha covid-19 mosu situasaun estadu emerjénsia halo sira labele dezenvolve sira-nia moris ekonomikamente.

Tanba ne’e, nia dehan, media mós tenke uza lia-fuan loloos, solidariedade, labele tau lia-fuan karidade, tanba intepretasaun husi karidade katak fó ismola.

Bispo Don Noberto husu Deputadu Sira Sukat Ibun

Entretantu, Bispu Dioseze Maliana, Don Noberto do Amaral husu ba deputadu Parlamentu Nasionál sira atu tenke sukat ibun bainhira koalia atu labele jeneraliza asaun karidade ne’ebé Xanana Gusmão halo.

“Horseik ha’u lee hela notisia ida iha media imprime balun, iha deputada ida ko’alia dehan asaun karidade ne’e hatun ema nia dignidade. Aduh... ha’u dehan ida ne’e ita ba ne’ebé? Karidade ne’e hatun dignidade ema nian? ne’e ita fehuk hotu ne’e. Fehuk ho bilan. Padahal ha’u dehan tiha ona, karidade ne’e mak sasukat ba ita tama ba reinu lalehan. Deputada mak ko’alia hanesan ne’e, ne’e ita ulun tun-ain sa’e,” dehan Bispu Norberto liu husi ninia diskursu iha seremónia inagurasaun Klinika Madre Cecilia dos Santos iha Suku Memo, Postu Administrativu Maliana, Munisipiu Bobonaro, Sabadu (25/07).

Tuir Don Norberto, karidade akontese iha relijiaun hotu iha mundu ne’ebé sai nu’udar dalan ida atu lori ema sa’e ka tama ba reinu lalehan.