Planu ida ne’e reflete iha orsamentu tokon $13.353,228 ba Ministériu Transporte no Komunikasaun ne’ebé propoin iha proposta Orsamentu Jeral Estadu (OJE) ba tinan fiskal 2025.
Ministru Transporte no Komunikasaun, Miguel Manetelu informa, OJE ne'ebé aloka ba MTK la inklui orsamentu né'ebé aloka ba ajensia sira. Orsamentu refere ba de'it administrasaun direita nian.
Ministru ne'e dehan, planu prioridade MTK ba tinan oin mak konklui instalasaun kabu submarinu no konstrusaun aeroportu internasional Prezidente Nikolau Lobato Komoro.
Kona-ba kabu submarinu, nia dehan, projetu konetividade nasionál dada fiu fibra optika to'o tiha ona iha Munisipiu ho Postu sira inklui sede suku mais ho LCP8 sei dada fiu fibra optika ne'e ba to'o iha postu sira fora husi munisipiu.
"Ne'e par atu halo saida? Par aban-bainrua ita-nia fiu to'o mai infraestrutura ne'e iha ona par bele internet ne'e ba to'o Postu Administrativu sira ne’ebé fora husi munisipiu," dehan Manetelu iha palasiu governu, Segunda (21/10).
Ba konstrusaun aeroportu, Ministru ne’e hatete, iha tinan 2025 sei hahú kontrusaun.
Aleinde planu prioridade rua ne’e, MTK mós iha planu seluk ne’ebé atu implementa iha tinan oin hanesan halo estudu viabilidade ba portu iha Atauro no portu iha Kom, Munisipiu Lautem.
Ba Portu iha Kom, nia dehan, liu husi kooperasaun entre Ministériu Agrikultura no Peskas ho KOICA halo ona estudu viabilidade ba portu Kom ba konstrusaun postu ba peskas.
"Mais MTK, ami ko'alia ona ho Ministériu Agrikultura no Peskas katak se peskas halo portu, MTK halo portu, transporta sasan ne'e bele karun, nusa mak ita la hamutuk haree portu ne'ebé integradu."
Ho nune’e, Manetelu hatutan, nia parte simu ona rezultadu estudu viabilidade portu Kom no sei haree hamutuk.
“Se dadus ne'ebé mak iha estudu viabilidade ne'e kompletu ona mak sei la halo tan estudu viabilidade iha Kom. Ita sei halo de'it estudu viabilidade iha Atauro, no proposta agora iha ADN.IP no persiza halo koordenasaun ho Gabinete Tasi Timor iha los portu Atauro ne’e iha los coral ida iha ne'ebá," nia esplika.
Ba oin karik portu halo iha Atauro, movimentu ro sira tama-sai lao tuir koral ne'ebé iha portu Atauro nian.
Programa seluk, nia hatutan, iha fulan hirak liu ba MTK halo ona lansamentu ba planu mestre ba transporte publiku nian no daudauk ne’e ADB kontinua halo estudu viabilidade.
"Hanesan ha'u temi bebeik, tuir planu mestre ne'e define ona katak husi parte lorosa’e nian nia rai iha Halidoral, terminal sira husi tasi mane nian rai sorin balun iha merkadu Manleu nian, matebian Gil Alves kuandu sosa rai atu halo uma iha Manleu nia oferese rai sorin balun atu halo terminal. No terminal parte loromonu nian haruka ona surat ba Ministériu Justisa atu identifika rai ruma iha Tibar."
Entretantu, MTK nia proposta ba OJE 2025 ho total tokon $13.353.528 ne’ebé fahe ba kategoria Salariu Vensimentu iha $459,105, Bens Servisu $6.336.53, tranferensia públika $1.811,500, kapital menor rihun $250, no kapital dezennvolvimentu $296.860.
Entretantu, Prezidente Komisaun E Parlamentu Nasional, trata asuntu Infrastrutura, Marcos Xavier informa, iha OJE 2025 MTK aumenta tan millaun $1 ba bens servisu.
Orsamentu ne’e, nia dehan, MTK preve iha ne’ebá tanba iha 2025 iha instalasaun ba kabu submarinu, nune’e sira rezerva osan atu asegura lina internet labele kotu.
