Atu realiza planu ne’e, iha Orsamentu Jeral Estadu ba tinan 2025, Ministériu ne’ebé lidera husi Francisco Kalbuadi Lay, ne’e prevee orsamentu tokon $10 resin.
Vise Primeiru Ministru, Ministru Koordenadór Asuntu Ekonomikus, no Ministru Turizmu Ambiente, Francisco Kalbuady Lay informa, programa prioridade ba tinan oin mak foku liu ba sitiu turizmu sira iha teritóriu TL laran tomak.
“Osan ba Ministériu Turizmu no Ambinete tinan oin mai ita tau milliaun $10, fahe pur kategoria hodi tau ba programa sira ne’ebé trasa iha MTA nia laran,” dehan Kalbuadi durante audnesia ho komisaun C no D, iha Parlamentu Nasionál, Segunda (21/10).
Husi total orsamentu tokon $10.963,847 ne’e fahe ba kategoria salariu no vensimentu $4.813.195, Bens Servisu $4.417.617, transferénsia públika $685.000, kapitál menor $171.500, kapitál dezenvolvimentu $876.535, programa funsionamentu dezenvolvimentu institusionál $4.974.763, programa protesaun no konservasaun ambiente $1.787.441, no programa turizmu $4.201.643.
Orsamentu ne’ebé aloka ba transferensia publika, Ministru Kalbuadi esplika, tuir planu MTA nian atu apoiu eventu relijiozu no eventu kultural sira, apoiu ba turizmu komunitáriu, estabele suku pilotu turizmu lima iha Munisipiu Manatutu, Aileu, Ainaro, Vikeke no Atauro.
Ba kapitiál dezenvolvimentu, nia dehan, atu harii sentru turistiku iha Munisipiu sira no kontinuasaun manutensaun ba projetu sira ne’ebé hala’o ona ho OJE 2024 nian.
Ba kapitál menor, atu sosa ekipamentu informatika hodi apoiu ba servisu ministériu nian, inkkui ba instituisaun sira.
Entretantu, iha OJE 2024, MTA hetan alokasaun orsamentu hamutuk $11,069,826.00. ho ninia ezekusaun atinze 59%.
