Iha 20 Dezembru, horseik, Virgilio ofisialmente deklara ninia rezignasaun husi ninia kargu nu’udar Prezidente Konsellu Imprensa Timor-Leste.

Ba knar foun ne’ebé nia sei asume, Virgilio hatete, nia sei tau-matan mós ba kazu joven mate iha sela Komando Kaikoli.

"Ha'u-nia estatutu agora sei eleitu, seidauk provedoria, mais ha'u hanoin ne'e preokupasaun públiku nian, Provedor kuandu ba iha ne'ebá (PDHJ) tenke tau atensaun," dehan nia iha salaun KI Kintal Boot, Tersa (20/12).

Aleinde ba kazu ida ne’e, nia hatete, nia parte mós sei foku ba asuntu direitu umanus ne’ebé durante ne’e PDHJ hala’o ona.

“Atuál PDHJ dehan kada tinan keixa tama kuaze 200, ne'ebé presiza tau atensaun ba asuntu refere no kontinua mós buka tuir prosesu komprimisiu Timor-Leste nian ne'ebé estadu ratifika konvensaun internasional Direitus Umanu nian.”

"Tanba ita-nia komprimisiu halo tiha ona mais to'o iha ne'ebé, ida ne'e mak ha'u nian… mais buat hotu ita ba lai tenke haree lei ne'ebé regula iha estatutu PDHJ no mós koñese estrutura organizasaun nian, komunika ho maluk sira ne'ebé mak servisu iha PDHJ atu bele kontinua servisu ba oin," dehan nia.

Ba asuntu seluk, nia dehan, nia sei foku mós ba asuntu boa governasaun.

Maibé, nia hatutan, atu bele halo intervensaun ne’ebé kualidade tenke iha ekipa ida forte hodi halo peskiza no análiza ba politika públiku sira ne'ebé iha.

Tanba  ne'e, Virgilio hatutan, nia sei forma ekipa ida atu bele sai baze forte ba PDHJ hodi halo intervensaun ba orgaun sira seluk iha estadu nian.

"Ne'ebé ida ne'e ha'u ba PDHJ karik sei halo ida ne'e, pelumenus fulan ida nia laran halo diagnostiku ba iha komponente boa governasaun ida ne’e,” dehan nia.

Entretantu, iha 12 Dezembru ne’e, Parlamentu Nasionál liu husi votasaun hili Virgilio lídera PDHJ hodi halakon sidadaun na’in haat seluk hanesan Carme Joela Pereira, Ivo Colimau Lay Costa, Horacio de Almeida no Nelson Filomeno Rego de Jesus.