Xefe Estadu hato’o ksolok ba líder nasionál sira, ba Primeiru Ministru Kay Rala Xanana Gusmão, ho respeitu ba nia nu’udar ema ida-ne’ebé povu hili atu ukun.
“Ha’u sei akompaña Ministériu ida-idak nia hala’ok. Iha fulan balu nia laran ita sei bele tetu no sukat Governu nia membru ida-idak ninia knaar buras ka lae no oinsá. Hanesan Señór Primeiru Ministru dehan loloos sé de’it maka la ezekuta ninia programa ministeriál ka setoriál sei sai no troka ho ema seluk”, dehan Prezidente Repúblika José Ramos Horta liu husi diskursu iha sermonia posse ba membru IX Governu Konstituisional, iha Palasiu Prezidensial, Aitarak Laran, sabado (01/07).
Xefe Estadu hato’o ksolok mós ba membru Governu sira, Parlamentu, Tribunál, sira seluk hotu ne’ebé nia hadomi no respeita nu’udar ex-detentór órgaun soberania, autoridade militár no polisiál sira.
“Ba Xefe relijiozu no espitiruál sira, Igreja Katólika, Protestante no komunidade musulmana. Ba relijiozu sira hotu ha’u husu imi-nia harohan”,tenik nia.
Deputadu sira, membru Governu, asesór sira nomós funsionáriu, maka atu serví povu no implementa ho lalais, kompeténsia no laran no liman-moos, programa ne’ebé aprovadu hosi PN.
“Ha’u hakarak fó hanoin ba ema hotu-hotu katak, tuir artigu 74º nº 1 hosi RDTL nia Lei-Inan, Konstituisaun, Prezidente Repúblika maka nu’udar mahein ba hala’ok di’ak hosi instituisaun demokrátika hirak-hotu”, Xefe Estadu haktuir.
Entretantu, Prezidente Repúblika maka nu’udar “ mahein ba hala’ok hosi instituisaun demokrátika, tan ne’e nia sei tau matan oinsá maka servisu ba komunidade hala’o loos ka lae tuir programa Governu ne’ebé aprovadu liuhosi Lei hosi Parlamentu Nasionál.
