Diretóra Prestasaun Servisu Saúde, Odete da Silva Viegas hateten, haree ba moras Dengue ne’ebé mak iha, tanba mudansa klimátika, no ambiente ne’ebé favorese atu moras ne’e mosu.

“Entaun, ami husu ba komunidade tenke nafatin haree ambiente ne’ebé mak moos iha sira nia hela fatin, no MS kontinua hala’o nafatin nia papel atu halo konsiensializasaun,” dehan nia iha Ótel Timor, segunda horseik (20/12).

Ministériu Saúde liu husi nia ekipa, kontinua halo prevensaun liu husi tau abate ba iha bee sira, fumigasaun, maibé infelismente klima ne’ebé dadauk akontese dalaruma halo MS laprepara, tanba situasaun halo hela vasinasaun kontra Covid-19.

Iha fatin hanesan, Diretor Servisu Saúde Munisipiu Ermera,  António Fatima de Deus hateten, hahú inisiu fulan Dezembru to’o mai klaran ne’e, Serbisu saude Ermera, rejista ona kazu dengue hamutuk na’in 7, husi númeru ne’e seidauk rejista kazu mate no grave.

“Ita mos halo hela prevensaun lubuk ida, liu-liu ba iha oinsá ita atu hamoos bee dalan sira, kuda kalen aat sira liu-liu ba iha fatin ne’ebé mak poténsia atu hamosu susuk nia tolun. Ida-ne’e mak daudaun ita halo hela iha munisipiu Ermera,” nia hato’o.

Iha tinan 2019 iha kazu purvolta 318, hafoin ida ne’e mai iha tinan 2020 kazu tun ba iha 38 de’it, entaun ba iha tinan ida ne’e mak Servisu Saúde Emera foin rejista kazu hamutuk 7.

Alende ne’e, Médiku Espesialista Pediatria, Milena M. Lay Dos Santos informa, iha sala emerjénsia, kuaze  labarik ne’ebé baixa tama too iha pedeatria, maioria mai ho kazu dengue hotu, kazu hirak ne’e mai, postu administrativu iha Dili laran, kuaze HNGV rezista hotu.

Nune’e mós Diretora Servisu Saúde Munisípiu Dili, Agustinha Segurado hateten, labarik nain rua husi total kazu 502 ne’ebe tama hospital mak lakon ona vida, ne’e nia kauza mai husi udan hahú monu rai, iha fulan Novembru mai  Dezembru ne’e, entaun numeru kazu aumenta makas tanba mosu inundasaun no bee nalihun barak fó oportunidade ba susuk tolun barak liu tan hodi lori moras ba komunidade.

Tuir dadus estatistika saúde munisípiu Dili, hatudu totál kazu iha fulan Janeiru to’o loron 18 fulan Dezembru tinan 2021, kazu hamutuk liu ona 502 no husi númeru ne’e na’in rua ba leten mate ona.

Enkuantu iha tinan 2020, total kazu dengue hamutuk 807 no husi numeru ne’e nain 7 mak mate.