Diretór Ezekutivu ADTL Cesário da Silva hateten, sussesu lubuk Ida mak ADTL halo iha situasaun 2021, mak hanesan konsege hatan ba situasaun emerjensia ba ema ho defisiensia hamutuk 200 resin, liuliu bá nesesidade báziku no ijiene, maske la rezolve hotu iha territóriu timor laran tomak, maibé sira hatan no balun repetidu kuaze rihun haat ema ho defisiensia mak ADTL ho nia membru sira ajuda.
“Relasiona ho Ida Ida ne’e ita nia governu aprova ona planu asaun nasional liu husi ami nia esforsu no advokasia governu hodi bele aprova ona planu asaun ba tinan sanulu hahu husi 2021 to’o 2030,” Nia hateten iha edifisiu ADTL, Maskarinhas, tersa (21/12).
Servisu seluk ne’ebé mak ADTL esforsu hodi asina nota entendimentu entre asosiasaun ho IOB hodi fasilita bolsu estudu ba maluk defisiensia sira, tanbá situasaun sira ne’e konsidera sussesu Ida ne’ebé asosiasaun iha.
ADTL halo mós aprezentasaun relatóriu bá Valor Patrimoniu no Asaun (VPA) liu husi mekanizmu online no hato’o relatóriu ema ho defisiensia produsaun universal sei hala’o iha janeiru tinan oin.
Dezáfiu ne’ebé ema ho defisiensia hetan mak iha situasuan Covid-19 la hetan informasaun di’ak ba prosesu prevensaun durante iha tinan Ida ne’e bá vasina rasik no fasilidade públiku sira nia fasilidade la sufisiente ba ema ho defisiensia sira.
Iha fatin hanesan Diretor nasionál protesaun Direitu ba Ema ho Difisiensia Mateus da Silva informa, Governu liu husi Ministeriu Soliriedade Sosiál Inkluzaun (MSSI) iha pilar tolu, ida mak seguransa sosiál, Auzensia Sosiál no servisu Sosiál.
Nune’e, parte Governu nian haree mós kona-ba subsidiu ba maluk defisiénsia sira hamutuk rihun 9 resin, ba ferik katuas sira no mós bolsa da mãe ba labarik hamutuk 950.
MSSI mós fó asistensia aihan ba iha maluk defisiensia sira no apoia orsamentu ba iha organizasaun ne’ebé tau matan ba ema ho defisiénsia. Aleinde fasilita mos ema ho defisiensia sira asesu ba universidade.
"Ita asina akordu ho Ministeriu Ensinu superior siénsia no Kultura (MESSK) hodi fasilita labarik difisiensia sira, ne'ebé remata iha nivel sekundariu hodi kontinua iha universidade," nia hateten.
Agora nia prosesu la'o hela husi MESSK mak prepara materia atu fo exame ba labarik sira, depois sira pasa no asesu ba iha bolsu estudu ne'ebé husi MESSK prepara ona matéria.
Asistente Editor: Saturnina da Costa
