Ministru Obras Públika, Abel Pires hatete, ministériu ne’ebé nia lidera aloka orsamentu rihun haat hodi halo prezervasaun bee ne'ebé iha tempu udan sempre sulin tuun mai kapitál Dili ho velusidade boot.

"Rihun $4 ne'e ita esforsu atu halo prevensaun inundasaun, liu-liu halo prezervasaun udan-been labele tuun mai dala ida ho velosidade boot hodi  sobu estrada, ponte, uma," dehan Abel ba jornalista sira hafoin audensia públiku ho Komisaun E Parlamentu Nasional, Kinta (13/10).

Iha semana kotuk, Ministru informa, MOP halo ona kontratu ho Organizasaun Naun Governamental (ONG) neen hodi konserva bee iha Dili laran, liu-liu iha foho leten.

"Ita tenke rezolve problema nia huun mak iha (foho) leten, maioria iha Dili laran tomak, parte Hera-Akanunu leten to'o Manleuana," dehan nia.

Dezeñu ba prezervasaun bee, nia dehan, ANAS.IP halo ona no MOP fó fiar ba ONG neen hodi implementa.

“Esforsu tomak ne'ebé MOP halo bele garante katak iha tinan ne'e tekniku sira servisu hamutuk komunidade bele halo hotu atu tinan oin bele hamenus risku husi inundasaun.”

Alende iha Dili, Abel dehan, MOP mós sei ba munisipiu balun hodi buka rezolve problema inundasaun.

“Sei ba munisipiu Vikeke, tanba iha ne'ebá mota rua mak sempre problema, iha Suai mota Lome, Bononaru (mota) Loes entre ho Likisa,” nia informa.

Iha parte seluk, Xefe Aldeia Lesibutak, Suku Maneluana, Postu Administrativu Dom Aleixo, Munisipiu Dili, Estaquio Tilman hatete, udan ne’ebé akontese iha fulan konsege halo bee tama iha komunidade nia uma, maibé la grave hanesan inundasaun iha 4 Abril 2021.

Tan ne’e, tuir nia, presiza duni halo konservasaun ba bee husi foto leten, tanba durante ne’e inundasaun maka’as provoka husi bee husi foho.

"Ha'u hanoin ne'e presiza tanba bee tuun mai husi foho leten laiha buat ida mak satan netik entaun provoka rai halai taka metin hotu bee dalan sira ne'e mak inundasaun mosu,” dehan nia.