Ministru Obras Publika, Abel Pires rekoñese katak iha tempu udan ahi sempre mate-lakan tanba Eletrisidade Timor-Leste, Empreza Publiku (EDTL,EP) sei uza sistema distribuisaun manual.

"Tempu udan ona ne'e sempre mosu (ahi mate-lakan) tanba udan mai ho anin boot. Ha'u husu pasensia ba ita-nia inan-aman sira, ita hakarak hadia sistema distribuisaun dijitál par ita iha kapasidade lais liu atu identifika problema ne'e iha ne'ebé mais ne'e sei haan tempu," dehan Ministru Abel hafoin audensia públiku ho Komisaun E iha Parlamentu Nasional, Kinta (13/10).

Nia dehan, MOP halo esforsu tomak ho tekniku EDTL nian hodi bele implementa sistema dijital nune’e bele identifika problema ahi-mate lakan.

"Sei haan tempu, ita servisu hamutuk ho ADB hadia sistema ne'e mais ne'e tinan ida, rua tan ita bele realiza," dehan nia.

Tanba sei presiza tempu, Ministru ne’e husu atu komunidade sira pasensia uitoan hodi hein.

Durante ne’e, nia afirma EDTL,EP sei uza sistema manual nune’e bainhira mosu failansu tekniku sira mak tenke tuun ba hodi identifika idadaik.

"Ida ne'e mak ita-nia kondisaun maibé ami sempre esforsu maka’as par oinsa rezolve lalais kuandu ita identifika ona problema," dehan nia.

Entertantu, iha loron hirak ne'e komunidade sira ne’ebé hela iha area Mataduru, Dare, Komoro no seluk tan preokupa ho eletrisidade ne’ebé mate-lakan iha sira-nia area.