Idoza Rita do Santos, hatete, iha eleisaun povu mak hili, tanba ne’e, Prezidente ba povu tomak hodi hakbesik nia-aan ba povu sira.

"Hanesan Avo Xanana tau matan ba ami ferik no katuas no mós oan kiak sira, atu nune’e ami povu bele sente katak imi hadomi duni ami povu sira,"dehan nia bainhira partisipa serimonia komemorasaun loron Restaurasaun Independensia ba dala-20, iha Palasiu Prezidensial Aitarak Laran, sesta ne’e (20/05).

Nia hatutan, Prezidente foun tenke tau matan ba ema hotu-hotu labele hare ba kor, maibé tau matan ba ferik katuas, feto faluk no mane faluk no mós ba labarik joven sira.

Nia akresenta, Xefe Estadu atual, tenki halo mós hanesan Lider Karismatiku Kay Rala Xanana Gusmão, ne’ebé hakbesik-aan liu ba povu hodi haree sira nia moris.

Iha fatin hanesan, João da Costa, hatete, Prezidente foun, tenki lori esperansa hadia kondisaun povu nian ba moris diak.

Aleinde, husu mós ba Xefe Estadu atu koalia ho Governu atu kria fatin ba aileba sira.

"Ami hanesan aileba oan sente orgullu tebes ba Prezidente foun, maibe tenke tau matan hodi hadia povu nia moris no mós ami, husu kria fatin ba ami aileba oan sira,”dehan nia.

Ho nune’e, nia husu mós ba PR foun, atu koalia ho Governu kria kampu traballu ba oan sira ne'ebé remata ona sira nia eskola.

Entretantu, Sidonio Palomo Guterres, hanesan estudante  UNTL, hatete, hanesan estudante husu ba Xefe Estadu atu koalia ho Governu loke bolsa estudu barak, hodi  fasilita estudante sira no mós kria kampu traballu ba joven sira.

Tanba ne’e, nia espera katak, iha tinan lima mai, Xefe Estadu no Governu bele halo mudansa ba dezenvolvimentu liu-liu infraestutura bázika ne’ebé kontinua sai prekupasaun povu nian.

Entretantu, iha serimonia komemorasaun ne’e, povu, apresia ba Prezidente Repúblika, José Ramos Horta Ramos Horta, tanba bele loke odamatan aitarak laran ba ema hotu liu-liu joven no labarik sira hodi hakbesik-aan ba na’in ulun sira ne’ebé mai husi nasaun viziñu, hanesan, Portugal, Australia no nasaun seluk tan.