Diretór Assosiasaun Halibur Defisiensia Matan Timor-Leste (AHDMTL), Gaspar Afonso, hatete, aban, loron 20 fulan Maio 2022, nuudar loron Restaurasaun Independensia Timor-Leste ba dala-20 ona, maibé Ema ho Defisiensia sira seidauk goja sira nia direitu ho maximu.
Nune’e mós povu sei kiak no halerik ba dezenvolvimentu.
"Sim ita hare ba dezemvolvimentu iha Timor-Leste hakdasak nafatin, seidauk maximu, tanba povu barak sei halerik ba be'e mos, estrada, ahi no ema barak mak sei moris kiak, ne'e mak ha'u nia observasaun durante tinan 20 Timor-Leste ukun rasik-aan,"dehan nia ba Jornalista Online INDEPENDENTE, via telephone, kuarta horseik (18/05).
Nia hatutan, kada tinan lima, Xefe Estadu no Governu truka, maibé dezenvolvimentu sei nafatin hakdasak, tanba lider sira nasional sira lakohi rona malu no la fó liman ba malu.
"Sá tan ema ho defisiensia sira nia kondisaun, iha artigu 21 konsagra ona iha Konstituisaun RDTL ba Direitu Ema ho Defisiensia, maibé ema ho defisiensia sira seidauk maximu goja sira nia direitu, maske Timor-Leste ukun-aan ba tinan 20 ona," tenik nia.
Nia fó ezemplo, hanesan ema ho defisiensia atu asesu ba edukasaun sura ho liman fuan deit no seidauk to’o rihun, liu-liu sira ne’ebé ho defisiensia matan no tilun no mós seluk tan.
Nia haktuir, durante ne'e kondisaun povu no ema ho defisiensia sira nian, seidauk maximu, liu-liu ema ho defisiensia sira, sei halerik ba infraestutura bázika, edukasaun no mós nesesidade seluk tan.
Tuir nia, tinan 20 ona nasaun ukun-aan, lolos la merese atu povu halerik bebeik no terus tan.
Tanba ne’e, nia husu ba lider sira atu rona malu no fó liman ba malu, hodi halo mudansa ba dezenvolvimentu iha rai ida ne’e.
Entretantu, iha oportunidade ne’e, Diretór AHDMTL, hato’o nia kongratula ba Prezidente Repúblika eleitu, José Ramos Horta ne’ebé sei simu pose iha loron 19 maio 2022, kalan.
Nune’e mós husu ba PR José Ramos Horta atu tur hamutuk ho lider nasionál sira hodi bele aselera dezemvolvimentu ne'e ba oin no atu hare ba povu nia moris di'ak.
Iha sorin seluk, Diretór Ezekutivu Asosiasaun Defisiensia Timor-Leste (ADTL), Cezario da Silva hateten, Timor-Leste selebra ona loron restaurasaun independénsia RDTL ba dala 20 ona, maibé realidade kondisaun ema ho defisiensia jeral sei iha difikuldade liliu iha area rural sira.
'"Tanba ne'e ita husu nafatin atu prosesu dezenvolvimentu rai ida ne'e nian tenke asegura inklusividade, asesibilidade no sustentabilidade ba sidasaun hotu-hotu liliu sidadaun ho defisiensia ne'e iha area remotas iha duni kondisaun atu bele hola parte iha prosesu dezenvolvimentu nasional".
