Kestaun ne’e hato’o iha ambitu komemorasaun loron Restaurasaun Independensia ba dala-20 iha Palasiu Prezidensial Bairu Pite Dili, sesta ne’e.

Horta deklara, iha defisiensia fiziku na’in ida ne’ebé koñesidu tebes iha Timor-Leste, tanba ne’e, nia sei bolu atu servisu hamutuk iha gabineti Prezidente Repúblika hodi tau matan ba ema ho defisiensia sira iha nasaun ne’e.   

“Ita hotu hatene, ha’u la presija temi nia naran,  nia iha problema ba fiziku, maibé nia la iha problema ba psikolojia, katak, nia hanoin diak liu fali ema lubuk sira ne’ebé laos ho defisiensia. Ha’u hateten ba nia mai iha Prezidensial Aitarak laran, servisu hamutuk atu tau matan ba sira ne'ebé ho defisiensia liu-liu defisiensia matan,”dehan Xefe Estadu liu husi nia diskursu, iha loron komemorasaun Restaurasaun Independensia ba dala-20, iha Palasiu Prezidensial Aitarak laran, sesta ne’e (20/05).

Aleinde, atu servisu hamutuk ho sosiedade sivil sira tau matan ba ema ho defisiensia sira.

Iha Fatin hanesan, Martinho Freitas hanesan ema ho defisiensia fiziku, senti orgullu no apresia ba Prezidente Republika José Ramos Horta, ne’ebé hakarak atu kria departamentu defisiensia nian.

“Hanesan defisiensia sente kontenti no orgullu tanba durante ami luta tinan barak nia laran seidauk iha buat sira hanesan ne'e, atu nune’e ema ho defisiensia sira bele senti seguru atu hakbesik aan ba saúde, eskola no fatin seluk ne’ebé ita hotu presiza,”dehan nia.

Tanba ne’e, nia husu, ba Xefe Estadu atu realiza promesa ne’e no sai politika deit.

Entretantu, ema ho defisiensia ne’e, husu mós ba timor-oan liu-liu juventudi sira atu kria paz no unidade ba malu.