Ba Prezidente Repúblika, Ego Lemos hanesan artísta famouzu, nia mós ambientalista ne’ebé tinan barak ona mak hala’o atividade kultura, múzika no arte, hodi kontribui ba promove identidade Timor nian iha mundu inklui sai manán na’in ba prémiu boot iha Austrália.

“Iha fulan abríl nia laran, Ego Lemos sei ba Austrália, antes ba, ha’u sei nomeia nia hanesan Embaixadór Boavontade ba Meiu Ambiente no Kultura. Ha’u nomeia Ego Lemos ho orgullu Timoroan ida ne’ebé tau matan makas ba meiu ambiente ba ekolojia, ba ‘green economic’, ba dezenvolvimentu komunitáriu liu husi hametin no rekopera bee-matan,” katak Prezidente Ramos-Horta, iha komunikadu ne’ebé Online INDEPENDENTE sita.

Prezidénsia Repúblika sei hala’o serimónia ofisiál antes Ego Lemos aranka ba Austrália, bazeia ba konvite husi Austrália.

“Ego Lemos, Embaixadór Meiu Ambiente no kultura, tanba ne’e nia servisu tinan hirak liu laran desde joven to’o agora, ne’e mós hanesan orgullu ba Timoroan ida, no sei servisu hamutuk no metin liután ho Prezidénsia,” tenik Xefe Estadu.

Diretór Ezekutivu Permatil, Ego Lemos sente orgullu ba nomeasaun ne’e, hodi sai Embaixadór Boavontade ba meiu ambiente no kultura iha konferénsia internasionál Austrália ne’ebé sei hala’o iha fulan abríl tinan ne’e.

“Ha’u sente orgullu tebes, tanba na’i Prezidente seidauk ofisiál mais ohin bele deklara katak, nomeia ha’u ba embaixadór boavontade ba meiu ambiente no kultura. Ha’u halo servisu ida ne’e kleur ona liliu ba ambiente no mós múzika. Ha’u prontu na’i Prezidente bele nomeia ha’u atu reprezenta nasaun no povu Timor-Leste,” hatete Ego Lemos.

Entretantu, Ego Lemos hetan konvite partisipa iha konferénsia permakultural ne’e sai hanesan oradór prinsipál no mós lidera korru Lian Timor hodi hala’o tour múzika iha Austrália iha festival 7 ne’ebé halo parte husi programa diplomasia kultura.

Enkuantu, iha enkontru ne’e, Ego Lemos akompaña husi Izu Gembel, entrega mós lívru ho tema ‘The Topical Permaculture Guide Books’, ne’ebé iha nasaun 160 mak asesu ona ba lívru ne’e liu husi internet.