Nune’e, Xefe Estadu dehan, sei ko’alia ho Primeiru Ministru Taur Matan Ruak no mós Governante sira, atu buka solusaun hodi hadi’a fatin refere.

Prezidente Republika hatutan, povu tomak TL koñese konsidera Max Stahl hanesan, Eroi Nasional, tanba nia mós hetan ona pasaporte nasionalidade timorense nian, no hatene nia kontribuisaun ba ukun rasik-aan rai ida ne’e nian.

“Ha’u sei ko’alia ho Primeiru Ministru no Governante sira para ita lalais no urjenti hetan solusaun ida, ba uma kakuluk no fatin CAMSTL ne’ebé dadauk ne’e aat ona,”dehan Xefe Estadu, ba jornalista sira iha edifisiu CAMSTL, Liceu, Dili, sesta (16/09).

PR haktuir, CAMSTL fatin ne'ebé Saudozu Max Stahl harii hodi prezerva rai memoria no istoria TL nian.

Tuir Horta, Primeiru Ministru mós koñese diak Saudozu Max Stahl, tanba sira uluk luta ba rai ida ne’e, maibé ikus mai Lider sira laiha sentimentu, ba hadi’a fatin ne’e.

Tanba, udan mós atu mai dadaun ona, nune’e tenke urjente hadi’a ona fatin ne’e.

“Ita labele halo de'it omenajen tanis ba Max Stahl nia mate, maibé depois la fó apoiu ne'ebé mak diak para hadia fatin ida ne'e, tanba fatin ne'e perigozu los, udan boot mai dala ida tan buat hotu bele aat. Ha’u haree fiu eletrisidade sira ne’e antigu los ona, no bele soke, ne'e duni ha'u sei ko’alia ho Primeiru Ministru atu hadi’a fatin ne'e,”dehan PR.

Ho nune’e, PR husu ba Governu atu tau mós orsamentu hodi hadi’a no aumenta fatin ne’e.

Horta akresenta, fatin CAMSTL tenke hadi’a halo diak, hodi hola parte no kontribui mós ba istoria, edukasaun, turizmu no seluk tan. Tanba, fatin refere besik hela Universiade Nasional Timor lorosa'e no muzeu rezistensia.

“Tuir lolos dahuluk, hare hodi hadi’a kedas fatin ne'e, ho nivel profisional no dezeñu, e depois hola tan fatin sorin parte Benefika nian, hodi koalia ho ema sira iha ne'ebá karik sira hakarak hala’o negosiu kontinua, maibé parte tomak tenke entrega ba CAMSTL,”tenik nia.

Iha fatin hanesan, Diretór CAMSTL, Edio Pinto, hato’o agradese ba Prezidente Republika nia vizita, hodi haree direita kondisaun fatin refere.

"Liu husi nia vizita, bele hare direita saida mak durante ne'e akontese, ba dahuluk nia kontente fatin refere ne'ebé kontinua konta istoria no kuidadu istoria Timor-Leste nian, tanba fatin ne'e estudante no sidadaun sira mai asesu hodi hatene istoria,"dehan Diretór.

Entretantu, iha vizita, PR Horta triste, bainhira haree fatin ne'e udan bele tama no eletridade mós balun aat ona.

Enkuantu, nia dehan, Prezidente Republika mós promete katak, sei ko’alia urjenti ho Governu atu haree no hadi’a fatin refere.