PR Promulga Dekretu-Lei Hodi Transforma CNA Sai Institutu Públiku Featured

By Marsu 01, 2023 423
Prezidente Repúblika, José Ramós Horta. Foto:Dok/INDEPENDENTE. Prezidente Repúblika, José Ramós Horta. Foto:Dok/INDEPENDENTE.

DILI: Prezidente Repúblika, José Ramós Horta, promulga ona Dekretu-Lei númeru 3/2023, 15 Fevereiru hodi transforma Komisaun Nasionál Aprovizionamentu (CAN-sigla portugés) sai Institutu Públiku foun.

Dekretu-Lei ne’e hetan ona promulgasaun husi Prezidente Repúblika no públika ona iha Jornal da República iha loron 15 fulan-fevereiru liubá.

Enkuantu, diploma foun ne’e aprezenta husi Ministru Finansas, Rui Gomes ho objetivu prinsipál atu hasa’e kapasidade jestaun, resposta no autonomia instituisaun CNA hodi mellora liután efisiensia no efikasia aprovizionamentu iha setór públiku administrativu.

Tinan kotuk, eis Prezidente Repúblika Francisco Guterres Lú-Olo promulga ona Dekretu-Lei númeru 22/2022, 11 Maiu konaba Rejime Jurídiku Aprovizionamentu, Kontratu Públiku ho nia infrasaun sira.

Diploma ida ne’e alarga ona atribuisaun ba CNA nune’e importante tebes atu adapta Institutu Públiku foun ne’e nia natureza servisu no rekursus sira ho tarefa servisus foun ne’ebé CNA sei hala’o.

Ho Diploma foun ne’e CNA hetan atribuisaun hodi halo prosedimentu aprovizionamentu ho valór iguál ka liu $1 millão ba servisu no entidade setór públiku administrativu. Bainhira hetan solisitasaun husi Presidencia República, Parlamentu Nasionál, RAEOA no Munisípiu sira, CNA mós bele halo prosedimentu aprovizionamentu ba entidade Estadu hirak ne’e.

Diploma foun ne’e permite CNA atu organiza nia estrutura servisus ne’ebé inklui diresaun sira hanesan, Diresaun Apoiu Jurídiku, Diresaun Aprovizionamentu Bens no Servisus, Diresaun Aprovizionamentu Obras, Diresaun Kontrolu Kualidade no Diresaun Servisus Korporativus.

Durante mandatu Oitavu Governu Konstitusionál, hahú husi tinan 2018 to’o inísiu Fevereiru 2023, CNA realiza ona konkursu aprovizionamentu hamutuk 352 projetus ho totál kustu estimativa $1,3 biliões.

“Durante tinan lima ikus ne’e, CNA realiza ona konkursu aprovizionamentu ba kontratu ne’ebé mak ezekuta ona hamutuk 257 projetus no valór kontratu kuaze $621,1 milhões,” dehan Ministru Finansas Rui Gomes, iha komunikadu ne’ebé Online INDEPENDENTE sita, kuarta ne’e (01/03).

Nia dehan, totál númeru pakote ne’ebé iha hela progresu nia laran hamutuk 95 projetus ho kustu estimativa $682,7 milhões.

Nune’e, husi tinan 2018 to’o inísiu fulan-Fevereiru 2023, CNA realiza ona konkursu aprovizionamentu hamutuk 352 projetus ho kustu estimativa hamutuk $1,3 biliões.

Fontes finansiamentu orsamentu ba projetus 352 ne’e mai husi fontes prinsipál tolu hanesan fundu infraestrutura, fundu la’ós-infraestrutura, no empréstimu husi ADB no Banku Mundiál.

Recorda iha 2011, CNA kria liuhusi Dekretu-Lei númeru 14/2011, 30 Marsu ho objetivu atu presta servisu aprovizionamentu ida ne’ebé di’ak ba liña ministerias no entidades públiku sira seluk liuliu ba projetu infraestrutura boot estratéjiku sira nomós atu alkanse tranparénsia ba prosesu aprovizionamentu Estadu nian.

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV

Tuir ami iha Twitter

Kalendariu Notisia

« April 2024 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30